Atap aıtqanda, QR Energetıka mınıstrligi, «Samuryq-Qazyna» UÁQ jáne avstrııalyq Borealis kompanııasynyń arasynda Atyraý oblysynda biriktirilgen gazhımııalyq keshen qurylysyna qatysty yntymaqtastyqtyń negizgi sharttary týraly, sondaı-aq Atyraý oblysynda polıpropılen óndirý zaýytyndaǵy qatysý úlesin satyp alýǵa qatysty ózara túsinistik týraly memorandýmdarǵa qol qoıyldy.
Atyraý oblysynyń ákimi Nurlan Noǵaev avstrııalyq «Borealis» kompanııasynyń basshylyǵymen kezdesý ótkizdi. Investordyń Atyraý oblysyna tanysý maqsatyndaǵy sapary kompanııanyń bolashaq jobanyń ornalasatyn jeri týraly barlyq qajetti aqparat alýyna múmkindik beredi.
«Borealis» kompanııasynyń basqarma tóraǵasy Alfred Sterngtiń aıtýynsha bul kompanııa basqarmasynyń Qazaqstanǵa tolyq quramdaǵy alǵashqy sapary. Sterng ınvestorlardyń Qazaqstan aýmaǵynda jobany iske asyrýǵa degen qyzyǵýshylyǵyn atap ótti.
- Biz polıetılen men polıpropılen óndirisindegi kóshbasshylardyń biri bolyp tabylamyz. Biz Abý-Dabı arqyly Azııa naryǵyn baǵyndyrý úshin kóp ýaqyt jumsadyq. Bizdiń joǵary tehnologııalarymyz bar, biz ózimizge tartymdy bolyp tabylatyn osy jobaǵa qatysýǵa daıynbyz, - dedi Alfred Sterng.
Kezdesý barysynda Atyraý qalasynyń ákimi Serik Shapkenov jergilikti atqarýshy organdardyń Atyraý qalasy turǵyndardyń barlyq toby úshin qolaıly ári jaıly bolýy úshin bar kúshin salyp otyrǵanyn aıta kele, ınvestorlarǵa oblys ortalyǵyndaǵy áleýmettik ınfraqurylym týraly áńgimeledi.
О́z kezeginde Atyraý oblysynyń ákimi Nurlan Noǵaev óńir aýmaǵynda jobany iske asyrýǵa barlyq qajetti kómek kórsetýge daıyn ekenin bildirdi.
- Memleket basshysy Nursultan Nazarbaev elimizge ınvestorlar tartýǵa basa nazar aýdarady. Qazaqstannyń áleýeti zor, ony ıgerýge ozyq tehnologııalar men bilikti kadrlardy tartý qajet. Biz nátıjeli yntymaqtastyqqa daıynbyz, -dedi sóz sońynda Nurlan Noǵaev.
Investorlarmen keńeske QR Energetıka vıse-mınıstri Maǵzom Myrzaǵalıev pen «Biriktirilgen hımııalyq kompanııa» JShS basshylyǵy qatysty.
Borealis álemdegi polıetılen óndirýshi 4 iri kompanııanyń qataryna kiredi, ári joǵary tehnologııaly jáne joǵary marjınaldyq bolyp tabylady. Borealis aksıonerleri Mubadala (OAE) – 64% jáne OMV (Avstrııa) – 36%.
