Baǵdarlamashy Ernar Shambaev toǵyzqumalaq oıynynyń «Android» jáne «Windows» operasııalyq júıelerine arnalǵan qosymshasyn ázirlegen. Mobıldik qosymsha zııatkerlik oıyndardyń áýesqoılary arasynda qysqa ýaqytta tanymal boldy jáne kompıýterlik baǵdarlamalar arasynda ótetin álem chempıonattarynda 4 ret jeńimpaz atalǵan. Osy mobıldi qosymshany ázirleý úshin Ernar 10 jyl ýaqyt jumsaǵan.
Dúnıejúzilik «Toǵyzqumalaq» federasııasynyń prezıdenti Alıhan Baımenov: «Toǵyzqumalaq zııatkerlik oıyny – jastardy tárbıeleýdiń tıimdi quraly, ol logıkalyq oılaýdy, jiger men tabandylyq sııaqty qasıetterdi damytýǵa yqpal etedi. Bizdiń dástúrli oıynymyz qazirgi zamannyń talapyna saı bolyp, jastardyń búgingi qajettilikterin qanaǵattandyratynyna qýanyshtymyn. Kazirdiń ózinde mobıldi qosymshany qoldanyp, týrnırler ótkizilýde. Toǵyzqumalaqtyń mobıldi nusqasy oıynǵa degen qyzyǵýshylyqty odan ári arttyratynyna senimdimin», - dep málimdedi.
Ernar Shambaev kompıýterlik lıngvıstıkany shetelde oqyǵan. Sondaı-aq, ol qazaq tilindegi mátinderdi kırıllısadan jańa latyn grafıkasyna aınaldyrýǵa múmkindik beretin «Jańa qazaq» qosymshasynyń avtory bolyp tabylady.
Toǵyzqumalaq tek Qazaqstanda ǵana emes, sonymen qatar Germanııa, Chehııa, Fransııa, Shveısarııa jáne tipti Kolýmbııa sııaqty álemniń kóptegen elderinde de tanymal. Qazaqstanda toǵyzqumalaqpen eki júz myńnan astam adam shuǵyldanady.
