Memleket basshysy jarlyqqa jarııa túrde qol qoıý rásiminde sóılegen sózinde Shymkent mıllıonnan astam turǵyny bar Astana men Almaty qalalarynyń qataryna qosylǵanyn aıtty.
– «Qazaqstan Respýblıkasynyń ákimshilik-aýmaqtyq qurylysy týraly» zańnyń 3-babynyń 1-tarmaǵyna sáıkes búgin men qol qoıatyn jarlyq Shymkentke respýblıkalyq mańyzy bar qala mártebesin beredi. Bul ákimshilik birlik elimizdegi on jetinshi aımaq bolady. Oblys ortalyǵy ǵasyrlar boıy Qazaq handyǵynyń jáne búkil túrki áleminiń saıası ári rýhanı ortalyǵy bolǵan Túrkistan qalasyna kóshiriledi, – dedi Qazaqstan Prezıdenti.
Nursultan Nazarbaev jańadan qurylǵan Túrkistan oblysynda jańa ákimshilik fýnksııalardy sapaly iske asyrý úshin barlyq múmkindikter bar ekenin aıtyp, qabyldanǵan sheshimniń tarıhı mánine toqtaldy.
– Shymkent bizdiń eldiń ǵana emes, búkil Ortalyq Azııa óńiriniń ınvestısııalar, tehnologııalar jáne ıntellektýaldy resýrstar tartatyn jańa ortalyǵyna aınalady. Bul úshin barlyq jaǵdaı men qajetti áleýet bar, – dedi Memleket basshysy.
Qazaqstan Prezıdenti Shymkenttiń respýblıkalyq mártebe alýy onyń odan ári ilgerileýine septigin tıgizetinine jáne qalanyń aldynda jańa perspektıvalar ashylatynyna senim bildirdi.
– Bul qadam shahardyń teńgermeli áleýmettik-ekonomıkalyq damýyna jáne búkil óńir turǵyndarynyń turmys sapasynyń dáıekti túrde artýyna tyń serpin beredi, – dedi Nursultan Nazarbaev.
Qol qoıý rásiminiń sońynda Memleket basshysy Prezıdent Ákimshiligine, Úkimetke jáne oblys ákimdigine jarlyqty sapaly ári shuǵyl iske asyrý, sondaı-aq jergilikti memlekettik organdar men mekemelerdiń úzdiksiz ári tıimdi qyzmetin qamtamasyz etý jóninde birqatar tapsyrma berdi.
