Jeń ushynan jalǵasýǵa jol joq

О́ńir úshin turǵyn úı kezeginiń saqtalmaýy men baspana bólý barysynda jekelegen azamattarǵa artyqshylyqtar berý de tańsyq qubylys emes. Memlekettik qyzmet isteri jáne sybaılas jemqorlyqqa qarsy is-qımyl agenttigi Jambyl ob­lystyq departamentiniń málimetteri boıynsha, turǵyn úı-kommýnaldyq bólimderiniń jumystaryna jasalǵan taldaý Sarysý aýdanynyń turǵyn úı komıssııasynyń bir bólmeli páter alýy tıis azamattar B. men P.-ǵa zańsyz artyqshylyqtar jasaǵanyn kórsetti. Zańnama talaptaryna qaramastan, olarǵa eki bólmeli páterler berilgen. Al, eki balasy bar azamatsha B.-ǵa turǵyn úı komıssııasynyń sheshimimen eki bólmeli páter berilse, osyndaı jaǵdaıdaǵy eki balaly azamatshalar K. men Z.-ǵa komıssııa sheshimimen úsh bólmeli páterler bólingen. Buǵan qosa, turǵyn úı komıssııasy músheleriniń zańsyz áreketteri men turǵyn úılerdi zańsyz bólý saldarynan zańnamamen retteletin belgilengen turǵyn úı alý kezeginiń reti buzylǵan. 119 jáne 120-kezektegi kóp balaly otbasyly azamatshalar T. men I.-ge páterler, 117-kezek retimen turǵan dál sondaı kóp balaly otbasyly azamatsha N.-dan buryn berilgen, bul azamatsha qazirgi kúnge deıin óz kezegin kútýde. Kezegi jetpegen adamdarǵa negizsiz páter berýdiń osyndaı faktileri Talas aýdanynda da anyqtaldy. Kináliler tártiptik jaýapkershilikke tartyldy.

Sonymen qatar Aýyl sharýashylyǵy mınıstrligi Agro­ónerkásiptik keshendegi mem­lekettik ınspeksııa komı­tetiniń oblystyq aýmaqtyq ınspeksııasynyń 10 myńdaı fıtosanıtarlyq sertıfıkattardy zańsyz berý faktileri tirkeldi. Memlekettik ister jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń basshysy Maqsut Nálibaevtyń aıtýynsha, bul memlekettik qyzmet tolyq emes qujattar paketimen júıeli negizde sońǵy 2 jyl boıy kórsetilip kelgen. Osylaısha Aýyl sharýashylyǵy mınıstriniń buıryǵymen beki­tilgen tıisti reglament talaptaryna qaramastan, qabyldanǵan ótinimderdiń kópshiligi tir­keýge alynbaǵan, sondaı-aq bas­shylyqtyń buryshtamasy men kiris mórtabany joq jáne ótinishtiń kelip túsken kúni kórsetilmegen. Demek, mem­lekettik qyzmet kórsetý mer­zimin sozbalańǵa salýǵa, ne bolmasa ony jyldamdatyp jibe­rýge múmkindik alý úshin qabyldanǵan ótinimder ádeıi tirkeýge alynbaǵan. Tipten, ótip ketken kúnmen sertıfıkattar jasaý jaǵdaılary da anyqtaldy. Nátıjesinde, Qylmystyq kodekstiń 369-­babynyń 2-tarmaǵy – qyz­met­­tik jalǵandyq deregi boıynsha ınspeksııanyń bas mamany S.-ǵa qatysty qylmystyq is qozǵaldy. Sot sheshimimen memlekettik qyzmetshi kináli dep tanylyp, múlkin tárkileý jáne memlekettik qyzmette ómir boıyna laýazym ıelený quqyǵynan aıyra otyryp, oǵan 1 mıllıon 588 myń teńgeden astam kólemde aıyppul salyndy.

О́kinishke qaraı, kóp azamat qazirgi kúni zańnamaǵa sáıkes ártúrli zańsyz ıgilikter alǵan adamdar ǵana emes, olardy bergender de jazaǵa tartylatynyn umytyp ketedi. Aǵymdaǵy jyldyń sáýir aıynda Memlekettik ister jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamenti men jergilikti polısııa qyz­metiniń birlese júrgizgen reı­dtik tekserisi barysynda Jol qozǵalysy erejelerin buzǵan, Lexus GX 470 markaly kólik júrgizýshisi, azamat R.-nyń JPQ ınspektorlaryna 2 000 teńge kóleminde zańsyz materıaldyq syıaqy berý faktisi anyqtaldy. Sonymen Ákimshilik kodekstiń 676-baby (jeke tulǵalardyń zańsyz materıaldyq syıaqy berýi) boıynsha júrgizýshige qatysty ákimshilik is qozǵalyp, qalalyq mamandandyrylǵan ákimshilik sottyń qaraýyna jóneltildi. Nátıjesinde, sot­ qaýlysymen azamat R. 481­ myń teńge kólemindegi aıyp­pul túrindegi ákimshilik jaýap­kershilikke tartyldy.

Taǵy bir mysal. Oblystyq ishki ister departamenti bas­pasóz qyzmetiniń habarlaýynsha, qańtar aıynyń sońynda Ishki ister mınıstrligi Esirt­ki bıznesimen kúres departa­mentiniń qyzmetkerleri Qordaı aýdanynyń aýmaǵynda azamat Sh.-ny ustap, odan salmaǵy 187,14 gramm geroın tabylǵan. Qylmystyq is odan ári tergeý jumystaryn júrgizý úshin oblystyq IID tergeýshisi K.-ge tapsyrylǵan. Biraz ýaqyttan keıin oǵan azamat I. kelip, ózin ustalýshynyń týysymyn dep tanystyrǵan jáne qabyldaýyn ótingen. Qyzmettik kabınette azamat I. tergeýshige 1 mıllıon teńge usynyp, azamat Sh.-nyń áreketin neǵurlym jeńil qylmys túrine qaıta saralaýdy suraǵan. Azamat I.-diń polısııa qyzmetkerine aqsha usynǵan zańsyz áreketi qujattandyrylyp, aıǵaq zattar alyndy jáne qylmystyq is materıaldaryna tigildi. Azamat I. men onyń osy iske qatysqan ápkesi de sot arqyly 2 aıǵa qamaýǵa alyndy. Sotqa deıingi tergeý amaldary júrgizilýde.

Jalpy 2017 jyly kór­setiletin memlekettik qyz­met­ter salasyndaǵy quqyq buzý­­shylyqtar boıynsha ákim­shilik quqyq buzýshylyqtar jasa­ǵany úshin basym bóligi aýdan ákimdikteriniń bólim basshylary bolyp tabylatyn laýazymdy tulǵalarǵa qatysty 16 ákimshilik hattama toltyryldy. Olardyń barlyǵy jalpy somasy 1 mıllıon 500 teńge kólemindegi aıyppul túrindegi jaýapkershilikke tartylyp, atalǵan soma tolyq kólemde memleket kirisine alyndy.

Maqsut Nálibaev sonymen qatar, aǵymdaǵy jyldyń birinshi toqsanynda óńirlik memlekettik organdardyń shamamen 2 mıllıon teńgege memlekettik qyzmet kórsetkenin atap ótti. Aqparattyq júıeler arqyly kórsetilgen memlekettik qyzmettiń ósý qarqyny kóńil qýantady. Sońǵy jyldary elektrondy formatta kórsetilgen qyzmetterdiń úles salmaǵy 33,5 paıyzǵa ósti. Demek, dástúrli tásilmen kórsetiletin qyzmet sany edáýir azaıyp, sybaılas jemqorlyq táýekelderi de tómendeýde.

Aıjan MADIMAROVA,

Jambyl oblysy boıynsha memlekettik qyzmet isteri departamentiniń baspasóz hatshysy

Taraz