Jıyn barysynda radıo salasyna qatysty ózekti máseleler, aýdıtorııamen jumys isteý, tyńdarman tartý sekildi mańyzdy jaıttar sóz boldy. Xtra Insights kompanııasynyń ókili Pol Amostyń moderatorlyǵymen ótken konferensııanyń alǵashqy sessııasynda tyńdarmanmen jumys isteý joldary talqylandy.
Qazirgi tańda jańa medıanyń shyǵýymen radıoǵa suranystyń azaıǵany belgili. Alaıda jıynǵa kelgen sarapshylar munyń ýaqytsha qubylys ekenine, radıonyń áli de tyńdarman qulaǵynyń quryshyn qandyra beretinine senimdi. Máselen, konferensııada sóz sóılegen Radıo jáne jańa tehnologııa jónindegi halyqaralyq sarapshy Stıv Ahernniń aıtýynsha, zamanaýı tehnologııalar radıony «óltirmeıdi». Kerisinshe solardy qoldaný arqyly radıo salasy jańasha qyzmetke ıe bolady. Mysaly, aýdıojazbalardy ınternetke júkteý arqyly túrli podkastar jasap, ony keıinirek qaıta tyńdaýǵa múmkindik týady. Nátıjesinde radıotolqyndar jetpeıtin qashyqtyqta otyryp ınternet arqyly súıikti baǵdarlamany tyńdaýǵa múmkindik mol.
«Zertteýlerge súıensek, adamdar teledıdardy kórgennen tyńdaǵandy jón kóredi eken. О́ıtkeni tyńdaý arqyly beıneler aıqyndalyp, mıǵa qonymdy bola túsedi. Radıony basqa tirlikpen aınalysyp júrip tyńdaı berýge múmkindik bar. Iаǵnı, radıo derbestikke beıimdelip keledi», deıdi S.Ahern.
Sonymen qatar halyqaralyq sarapshy radıonyń eki túri mańyzǵa ıe ekenin atap ótti. Onyń biri – aqparattyq format bolsa, ekinshisi – oıyn-saýyqtyq baǵyt. S.Ahernniń paıymdaýynsha, endigi maqsat – osy eki baǵytty biriktiretin qolaıly orta qalyptastyrý.
Budan bólek konferensııa barysynda Úndistan radıosynyń bas dırektory Faıaıaz Shederıar óz elindegi tájirıbe týraly áńgimelep berse, Býtannyń ulttyq radıosynyń basshysy Tsherıng Vangchýk alaqandaı eldegi sany az tyńdarmanmen jumys isteý tásilderin aıtty. Sondaı-aq Ogaıo ýnıversıtetiniń professory Drıý Makdanıel de óz bilgenimen bólisti.
Is-shara elordanyń 20 jyldyq mereıtoıy qarsańynda «Azııa medıa dıalogy» jobasy aıasynda uıymdastyrylyp otyr. Atalǵan aýqymdy shara barysynda budan bólek birneshe konferensııalar, semınarlar men án festıvali ótpek. Jıynǵa Aqparat jáne kommýnıkasııalar mınıstrligi, Azııa jáne Tynyq muhıty habar taratý odaǵy, «Qazmedıa ortalyǵy» kompanııalary uıytqy boldy.
Uıymdastyrýshylardyń aıtýynsha, «Azııa medıa dıalogy» sharasyna 40 elden 150-ge jýyq delegat kelgen. Jıyn aıasynda «Azııa elderindegi radıo», «Medıa 2020» jáne «Án festıvali» uıymdastyrylýda.
Is-shara barysynda radıo formatyn jasaý, aýdıtorııany baqylaý jáne ony zertteý quraldary, Eýrazııa medıa naryǵynyń ozyq úlgilerimen tanysý, kontent jasaý tásilderi talqylanady. Jalpy, úsh kúnge josparlanǵan medıa jıyn búgin qorytyndylanady.
Abaı ASANKELDIULY,
«Egemen Qazaqstan»
