«Nur Otan» partııasynyń jańa jobalarynyń negizgi baǵyttarynyń biri «Sıfrly Qazaqstan» baǵdarlamasyn iske asyrýmen baılanysty ekeni belgili. Osyǵan oraı partııa Elbasynyń sıfrlandyrý men ekonomıkalyq jaǵynan bilimdi mamandardy daıyndaý jónindegi bastamasyna qoldaý bildirýdi kózdeıdi.
Jezqazǵanǵa sapary kezinde partııa Tóraǵasynyń birinshi orynbasary aldymen «Ulytaý Nan» nan zaýytyna bardy. Munda barlyq jumys prosesi avtomattandyrylǵan. Jańa kásiporyn táýligine 35 tonnaǵa deıin nan ónimin shyǵarady. Daıyn ónim Jezqazǵan men Sátbaev qalalaryna jáne Qarajal men Ulytaý aýdandaryna jetkiziledi. Zaýyt Elbasy aıqyndap bergen sıfr-
landyrý jónindegi barlyq talaptarǵa tolyq saı keletinin de erekshe atap ótken jón.
Kásiporyn qyzmetkerlerimen kezdesýde Máýlen Áshimbaev mundaı zamanaýı óndiris oshaǵynyń ashylýy jáne aldyńǵy qatarly ınnovasııalyq tehnologııalardyń engizilýi jergilikti halyqtyń jumyspen qamtylýyna múmkindik berip, óńirdiń ekonomıkalyq ahýalyn jaqsarta túsetinin atap ótti.
Jezqazǵanda baǵdarlamalaý negizderin úıretetin IT-ortalyq «UTARI KZ» óndiristik ınnovasııalyq kompanııasynyń bazasynda ashyldy. Ol jerde balalarǵa arnalǵan tegin IT-synyptar jumys isteıdi. Máýlen Áshimbaev atalǵan oryndarǵa da arnaıy baryp, kompanııanyń jumysymen tanysty. Bul jerde hımııa, munaı-gaz, metallýrgııa, tamaq, dári-dármek, avtomobıl óndirisi, kommýnaldyq sharýashylyq, transport pen qurylys salasynyń jumysshylary úshin arnaıy kıimder shyǵarylyp, kúndelikti ómir men demalýǵa arnalǵan kıimder tigiledi. Kásiporyn kompıýterlik baǵdarlamamen basqarylatyn arnaıy qondyrǵymen jabdyqtalǵan.
Tigin sehynyń jumysshylarymen kezdesken Máýlen Áshimbaev sońǵy aılarda «Nur Otan» partııasy áleýmettik máselelerge jiti kóńil bólip, aýqymdy jumystar atqaryp jatqanyn tilge tıek etti.
– Partııa Saıası keńesiniń otyrysynda Elbasy osy baǵyttaǵy birqatar jańa jobalarymyzdy bekitip, naqty tapsyrmalar berdi. Olardyń qatarynda elimizdiń bolashaǵy sanalatyn óskeleń urpaqtyń deni saý, bilimdi, básekege qabiletti bolyp qalyptasýy úshin jaǵdaı jasaý isi de bar. Soǵan oraı partııa elimiz boıynsha IT-synyptar ashýdy qolǵa aldy. Osy rette atalǵan synyptardy Astana, Almaty sııaqty iri shaharlarda ǵana emes, Jezqazǵan sııaqty monoqalalar men aýdandarda ashyp, ortalyqtan shalǵaıda jatqan eldi mekenderdegi balalardyń sıfrly saýattylyǵyn arttyrýǵa, básekege qabiletti bolýyna, bolashaqtyń mamandyqtaryn ıgerýge jaǵdaı jasaýymyz kerek. Osy turǵydan kelgende Qaraǵandy oblysynda atqarylyp jatqan jumystar kóńil qýantady. Oblys boıynsha qazirdiń ózinde birneshe IT-synyptar ashylyp, jergilikti jastar zamanaýı bilim alýda, – dedi «Nur Otan» partııasy Tóraǵasynyń birinshi orynbasary.
Osy rette «Nur Otan» partııasy qazaqstandyq IT-kompanııalar men óńirlik joǵary oqý oryndarynyń bazasynda 20 IT-ortalyq jáne tegin 1000 IT-synyp ashýdy qolǵa alyp, tıisti jumystardy bastap ketkenin atap ótken jón. Máýlen Áshimbaevtyń aıtýynsha, partııa IT-synyptardy ashý arqyly jastarǵa baǵdarlamalaý negizderin úıretip qana qoımaı, robot tehnıkalary men 3D modeldeýdi de meńgerýge jaǵdaı jasaıdy.
Jezqazǵanda «Rýhanı jańǵyrý» baǵdarlamasynyń «Týǵan jer» jobasy boıynsha da jumystar qarqyndy júrgizilýde. Sonyń aıasynda áleýmettik az qamtylǵan azamattarǵa arnalǵan jataqhana qaıta jańǵyrtylyp, jergilikti kompanııalardyń jas mamandaryna berilgen. Bul jataqhananyń ózgelerden basty aıyrmashylyǵy retinde onda birqatar partııalyq jobalardyń júzege asyrylýyn aıtýǵa bolady. Iаǵnı nurotandyq kásipkerler bul jerde jańa partııalyq bastamalarmen úndesetin birneshe qyzyqty bilim berý jobalaryn iske qosqan. Aıtalyq, ǵımarattyń birinshi qabatynda «Open space library» aımaǵy – ashyq elektrondyq kitaphanasy ornalasqan, al janynda «Úsh tuǵyrly til» baǵdarlamasy boıynsha ashylǵan – «Qazaq kluby» men «English club» jumys isteıdi. Jataqhanada derbes «Co-working ortalyǵy», «Iаrkıe ýmy» bilim men damý ortalyǵy, «Lıderler mektebi», «Business mentoring» jáne «Magic kitchen» ortalyqtary, shahmat pen toǵyzqumalaq oıynynyń stýdııasy bar. «Nur Otan» partııasynyń balalarǵa arnalǵan tegin IT-synyptar jobasy boıynsha «IT TECHNOLOGY FOR YOU» ortalyǵynyń bazasynda qazirgi zamanǵy IT-synyptar ashylǵan.
Bul jerde baǵdarlamalaý men robot tehnıkasy salasy álemdik standartqa saı oqytylady. Jyldyń sońyna deıin «Atameken» ulttyq kásipkerler palatasy jáne óńirdegi bıznes ókilderimen birge 2500-den astam adamdy qamtı-tyn balalarǵa arnalǵan tap osyndaı 40 IT-synyp ashý josparlanǵan.
«Rýhanı jańǵyrý» baǵdarlamasyn iske asyrý sheńberinde nurotandyqtar elimizdegi kitaphanalardy zamanaýı bilim ortalyqtaryna aınaldyrý bastamasyn qolǵa alǵany belgili. Máýlen Áshimbaev Sátbaev qalasyndaǵy osyndaı jańa bilim berý ortalyǵyna arnaıy bardy. Munda «So-working ortalyǵy» jergilikti kitaphana bazasynda ashylǵan. Onda jastardyń jumys isteýi jáne dem-
alýy úshin barlyq jaǵdaı jasalǵan. Atap aıtqanda, top bolyp jáne jeke jumys isteýge arnalǵan aımaqtar, tegin Wi-Fi, qajetti tehnıka jáne taǵy basqa múmkindikter qarastyrylǵan. Jastarmen kezdesýinde partııa Tóraǵasynyń birinshi orynbasary, osy jyldyń sońyna deıin «Nur Otannyń» qoldaýymen Qaraǵandy oblysynda taǵy da birqatar bilim ortalyǵynyń ashylatynyn aıtty.
Partııa Tóraǵasynyń tapsyrmasy boıynsha nurotandyqtar aǵa urpaqty qoldaýǵa baǵyttalǵan taǵy bir mańyzdy «Ardagerlerdi ardaqtaıyq» jobasyn iske asyrýda. Odan bólek, Jeńis kúni qarsańynda partııanyń bastamasy boıynsha «Erlik eshqashan umytylmaıdy» is-sharasy da qatar júrgizilip keledi. Jezqazǵanǵa sapary barysynda Máýlen Áshimbaev 95 jasqa tolǵan Uly Otan soǵysynyń ardageri Nına Stepanovna Vınogradovamen kezdesip, maıdangerdi mereıtoıymen quttyqtady.
* * *
Qaraǵandy oblysyna jumys sapary aıasynda «Nur Otan» partııasy Tóraǵasynyń birinshi orynbasary Máýlen Áshimbaev qasıetti Ulytaý jerinde ótken «Jezkıik» halyqaralyq mýzyka festıvaliniń ashylý saltanatyna qatysty. «Rýhanı jańǵyrý» baǵdarlamasy aıasynda ótken is-sharada Reseı, Fransııa, Polsha, Túrkııa, Shotlandııa, Japonııa, Tájikstan jáne sonaý Meksıka men Perý elinen kelgen etno-folklorlyq ansamblder óner kórsetti.
Festıvaldiń shymyldyǵy «Arqa sazy» folklorlyq ansambli men «Aqqý» ansambliniń teatrlandyrylǵan qoıylymymen túrildi. Alǵash bolyp sóz alǵan Mádenıet jáne sport mınıstri Arystanbek Muhamedıuly Elbasynyń barsha qatysýshylarǵa arnalǵan quttyqtaý hatyn oqyp berdi.
Qazaq eliniń rýhanı ortalyqtarynyń biri sanalatyn qasıetti Ulytaý jerinde, «Rýhanı jańǵyrý» baǵdaramasy aıasynda ótetin bul óner merekesi elimizdiń mádenı ómirindegi aıtýly oqıǵa bolady dep senemin. Tól tarıhy men ónerin qasterlegen ult qana bıik maqsattarǵa qol jetkize alady. Mýzyka óneri – halyqtyń tarıhyn, asqaq rýhyn, jan dúnıe sulýlyǵyn pash etetin rýhanı qundylyqtardyń biri. Sondaı-aq bul festıval halqymyzdyń mádenı murasyn jańǵyrtyp, folklorlyq ónerimizdiń baǵa jetpes baılyǵyn álemge tanytýǵa da oń yqpalyn tıgizedi dep oılaımyn», – delingen Elbasynyń quttyqtaýynda.
Budan soń, «Nur Otan» partııasy Tóraǵasynyń birinshi orynbasary M.Áshimbaev qatysýshylar men barsha halyqty osyndaı keremet óner keshimen quttyqtap, bul sharanyń qazaq mádenıetiniń órisin keńeıtetin tyń bastama ekenin aıtty.
– Bul festıval Elbasymyzdyń «Rýhanı jańǵyrý» baǵdarlamasynyń jemisi ekeni sózsiz. Biz osyndaı ıgi bastamalar arqyly halqymyzdyń rýhanı jáne mádenı qundylyqtaryn saqtap, olardy búkil álemge dáriptep, tanymaldylyǵyn arttyramyz. Sondaı-aq álem mádenıetiniń ozyq tustarynan úlgi alyp, ulttyq qundylyqtarymyzdyń aıasyn keńeıtemiz. Sondyqtan «Rýhanı jańǵyrý» baǵdarlamasy aıasynda ótip otyrǵan búgingi «Jezkıik» halyqaralyq festıvali aldymyzda turǵan osyndaı maqsattardyń sátti júzege asyrylýyna oń áserin tıgizedi dep senemiz, – dedi Máýlen Áshimbaev.
Venera Túgelbaı,
«Egemen Qazaqstan»
