«Saryarqa» ekspedısııa baǵyty 4 qyrkúıekke deıin sozylady. 16 kún ishinde ekspedısııa komandasynyń músheleri Aqmola, Pavlodar, Qaraǵandy jáne Soltústik Qazaqstan oblystarynyń eń qyzyqty jerlerimen 4595 shaqyrym jol júrip ótedi. Ekspedısııa quramynda saıahatshylar, televızııa jýrnalısteri, sheteldik jáne qazaqstandyq trevel-blogerler bar.
Qatysýshylar Astanadan Aqmola oblysyndaǵy Ereımentaý aýdany men Qaraǵandy oblysyndaǵy Osakarov aýdany aýmaǵynda ornalasqan «Buırataý» memlekettik ulttyq tabıǵı saıabaǵyna jol tartady. Odan soń ekspedısııa toby Pavlodar oblysyndaǵy Baıanaýyl ulttyq saıabaǵyna, Qarqaraly jáne Kókshetaýdaǵy memlekettik ulttyq tabıǵı saıabaqtaryna, Qorǵaljyn memlekettik tabıǵı qoryǵyna barady.
QazaqGeography RQB halyqaralyq jáne ǵylymı jobalar bóliminiń menedjeri Nurjan Alǵashov atap ótkendeı, ekspedısııa qorytyndylary boıynsha birneshe jumys jasalady. Birinshi kezekte, «Uly Dala Eline saıahat» jobasynyń qorytyndysy boıynsha týrızmdi damytý turǵysynda kúrdeli máseleler anyqtalyp, olardy sheshýge qatysty usynystar daıyndalady. Sonymen qatar, týrıster úshin jańa baǵyttar jasalyp, kórnekti jolnusqalar men foto-, beıne- derekter qory qurylady.
«Biz el aýmaǵyndaǵy bul aýqymdy jobaǵa qatysqanymyzǵa óte qýanyshtymyz. Barlyǵy jaqsy ótedi degen oıdamyz, osy 16 kún ishinde biz Qazaqstannyń barlyq ádemi jerleri týraly aıtamyz. Árbir qazaqstandyq pen sheteldik qonaqtar bizdiń kórikti jerlerimizge tamsanýy úshin, áleýmettik jeliler men televıdenıeni paıdalanamyz. Osy nysandardyń árqaısysynyń ózindik qaıtalanbas atmosferasy bar. Mysaly, Qorǵaljyn qoryǵyndaǵy Teńiz kóli 2000 jyly álemdegi eń erekshe kólder kiretin «Tiri kólder» halyqaralyq jelisine endi», — dedi Nurjan Alǵashov.
Jalpy, joba elimizdegi eń mańyzdy týrıstik klasterlerdi, sondaı-aq Qazaqstannyń on bir oblysy boıynsha alty baǵytty qamtıdy: «Tıan-Shan marjandary», «Altaı – órkenıet besigi», «Jońǵar Alataýy», «Saryarqa», «Teńizden teńizge deıin» jáne «Jańa Jibek joly». Baǵyttar týrızmdi damytý úshin qyzyqty tabıǵı jáne kıeli nysandardy meılinshe kóp qamtý esebimen josparlanǵan. Besinshi jáne altynshy baǵyttar Qyzylorda, Aqtóbe, Mańǵystaý oblystarynyń aýmaǵymen júretin «Teńizden teńizge deıin», sonymen qatar Túrkistan, Jambyl, Almaty oblystary arqyly ótetin «Jańa Jibek joly» bolady. Bul baǵyt boıynsha qazaqstandyq qatysýshylarǵa National Geographic Reseı telearnasynyń toby qosylady.
«Kazakh Tourism» Ulttyq kompanııasy QR Úkimetiniń qaýlysymen 2017 jyly shildede qurylǵan. Kompanııanyń negizgi mindetteri - elimizdiń týrıstik áleýetin shetelde damytý, sonymen qatar Qazaqstannyń týrıstik salasyna ınvestısııalar tartý.
«QazaqGeography» bes baǵyt boıynsha jumys isteıdi: geografııa, klımat; qorshaǵan orta, tabıǵı resýrstar; bıoalýantúrlilik; týrızm, saıahat, ólketaný; tarıhı-mádenı mura, etnografııa. Qazir Qazaqstan Respýblıkasynda 11 ókildigi ashylǵan.
Mádenıet jáne sport mınıstrliginiń Týrızm ındýstrııasy komıtetiniń tapsyrysy boıynsha «Kazakh Tourism» UK uıymdastyrýshysy bolyp tabylatyn «Saryarqa» baǵytynyń ekspedısııasyn Kazakh Tourism-men ózara yntymaqtastyq týraly memorandým aıasynda QazaqGeography iske asyrady.
