Elbasy kitaphanasynyń ǵımaratynda qazaqtyń uly aqyny, dana oıshyly, qazaq jazba ádebıetiniń negizin qalaýshy Abaı Qunanbaıulynyń týǵan kúnine oraı áleýmettik jelilerde jarııalanǵan «II Abaı oqýlary» jyl saıynǵy ádebıet saıysynyń jeńimpazdaryn marapattaý rásimi ótti. Abaı shyǵarmashylyǵy – otandyq mádenıetimizdiń maqtanyshy, ulttyq kodtyń ajyramas bóligi. Uly aqynnyń esimi dúnıe júziniń oqyrman qaýymyna keńinen tanymal.
Áleýmettik jeliler mol tájirıbesi bar qalyń oqyrman qaýymnyń jáne de Abaı týyndylarymen endi ǵana tanysqan jas oqyrmandardyń keńinen qoldanatyn belsendi «kezdesý ornyna» aınalǵan. Joba, eń aldymen, jastarǵa baǵyttalsa da elimizdiń barlyq óńirlerin qamtıtyn túrli jastaǵy turǵyndary men ár salada eńbek etetin mamandarynyń basyn qosty.
Elbasy kitaphanasy dırektorynyń orynbasary Ámirhan Rahymjanov: «Elbasy Nursultan Nazarbaev: «Abaı sózi – qazaqtyń boıtumary. Abaı murasy – qazaqtyń eń qasıetti qazynasy» degen edi. Elbasy kitaphanasy Memleket basshysynyń «Rýhanı jańǵyrý» baǵdarlamasyn qoldaý maqsatynda qazaqtyń uly aqynynyń murasyn nasıhattaýǵa arnalǵan «II Abaı oqýlary» atty dástúrli ádebı saıysyn jarııalaǵan bolatyn. Bul jastarymyzdy elin, jerin súıýge tárbıeleıtin ıgi shara. Osy saıystyń bıylǵy jeńimpazdaryn marapattaý rásimine qosh keldińizder» dep, jas talaptarǵa sát-sapar tiledi.
Merýert Toqmoldaeva (Taraz qalasy, stýdent) I oryn, Aqtoty Asanova (Almaty qalasy, oqýshy) II oryn, Dana Muhametilda (Taraz qalasy, stýdent) III oryn aldy. Sonymen qatar saıysqa qatysýshylar arnaıy atalymdar boıynsha da marapattaldy.
Saltanatty marapattaý rásimine fılologııa ǵylymdarynyń doktory Serik Negımov, belgili qoǵam qaıratkeri Orazgúl Asanǵazy men aıtysker aqyn Serikzat Dúısenǵazy, sondaı-aq ǵylym men mádenıet mamandary, Astana qalasynyń pedagogıkalyq qaýymdastyǵynyń ókilderi qatysty.
Baǵashar TURSYNBAIULY,
«Egemen Qazaqstan»
