– Búgingi basqosýda Tynyshtyqbek Ábdikákimulynyń shyǵarmashylyǵyn talqyladyq. Tynyshtyqbek aqyn qazirgi qazaq poezııasyndaǵy qubylys qoı. О́leńderi óte oıly, tereń. О́kinishtisi, aqynnyń atyn estigenimen, shyǵarmashylyǵynan habary az jastar da bar eken. Búgingi kezdesýde olar ózderine bir syrly álemniń qaqpasyn ashqandaı bolyp otyrdy. Sondyqtan osyndaı rýhanı basqosýdyń jıi ótýin qalaımyz, – dep óz oıyn bildirdi jas aqyn, Jazýshylar odaǵynyń múshesi Jangeldi Nemerebaı.
Qazaqstan Jazýshylar odaǵy Almaty oblystyq fılıalynyń basshysy, aqyn Erlan Júnistiń uıymdastyrýymen ótken shyǵarmashylyq basqosý endi turaqty jalǵaspaq.
– Alǵashqy pikirtalasqa Tynyshtyqbek Ábdikákimulynyń «Alqońyr dúnıe» kitaby negiz boldy. Aldaǵy kúnderi Aqushtap Baqtygereeva, Marhabat Baıǵut, О́tegen Oralbaev, Ǵalym Jaılybaı sekildi qalamgerlerdiń shyǵarmashylyǵyna qatysty talqylaýlar ótkizýdi de josparlap otyrmyz, – deıdi Qazaqstan Jazýshylar odaǵy Almaty oblystyq fılıalynyń basshysy.
Qalmahanbet MUQAMETQALI,
«Egemen Qazaqstan»
Almaty oblysy
