Uly Jibek jolyndaǵy kóne qalanyń turmysy men mádenıetinen syr shertetin arheologııalyq eksponattar kókshetaýlyqtardyń qyzyǵýshylyǵyn týdyryp otyr. Atalmysh mádenı shara «Rýhanı jańǵyrý» baǵdarlamasy aıasynda ótýde.
Jalpy Jambyl oblysy aýmaǵyndaǵy tarıhı-mádenı eskertkishterdiń jalpy sany 3365-ti quraıdy eken. Al, atalmysh qoryq mýzeı qaraýynda júzden astam tarıhı-mádenı eskertkishter jınaqtalǵan. Sol eskertkishterdiń otyzy respýblıkalyq dárejedegi eskertkishter bolsa, bes iri ortaǵasyrlyq Aqyrtas, Qulan, Aqtóbe-Stepnınskoe-Balasaǵun, О́rnek Qostóbe qalashyqtary halyqaralyq dárejedegi, ıaǵnı, IýNESKO-nyń Búkilálemdik muralar tizimine engen. Respýblıkalyq dárejedegi 25 eskertkishtiń qataryndaǵy Aısha bıbi, Babadja Hatýn, Qarahan baba, Tekturmas, Dáýitbek keseneleri Tarazdyń injý-marjany sanalady. Tarazdyq mýzeı qyzmetkerleri «Ejelgi Taraz eskertkishteri» tarıhı-mádenı qoryq-mýzeıiniń qurylǵanyna 20 jyl tolýyna oraı halqymyzdyń tarıhı qazynalaryn elge kórsetý úshin saparǵa shyǵypty.
Kórmege kelýshiler nazaryna 300-ge jýyq kóne jádigerler usynylǵan. Olardyń qatarynda túrgeshter zamanynan qalǵan syrǵalar, bilezikter, ózgeshe áshekeıler, qoldan quıylǵan shyraǵdandar da bar.
Baıqal BAIÁDIL,
«Egemen Qazaqstan»
