Sabyr Ahmetjanuly óz sózinde qor el táýelsizdigi úshin kúresken, osy jolda azap keshken, qurban bolǵan, biraq áli kúnge deıin esimderi ataýsyz qalǵan, eskerýsiz kele jatqan tulǵalardy ulyqtaý, olardyń ómirlerin nasıhattaý, jas urpaqqa úlgi etý maqsatyn ditteıtinin,bul baǵytta birqydyrý sharalar atqarylǵanymen, zańdyq turǵydan sheshilýdi qajet etetin máseleler bar ekenin jetkizdi.
«Bul jaǵynan kórshi Reseı jaqsy úlgi kórsetip otyr. Otan úshin ot keshken bozdaqtardy aqtaý, esimderin qasterleý týraly ondaǵan zań aktilerin qabyldady. Biz óz tarapymyzdan qýǵyn-súrginge ushyrap, jazyqsyz jazalanǵan otandastarymyzdyń mártebesin anyqtaıtyn zań jobasyn ázirlep, Parlament qaraýyna usyndyq. El tarıhynan óshpes oryn alǵan oqıǵalardyń bel ortasynan kórinip, belsene aralasqan arystardy taýyp, keıingi urpaqqa úlgi etý basty paryzymyz bolýy tıis,–deıdi qor tóraǵasy.
M. Qozybaev atyndaǵy Soltústik Qazaqstan memlekettik ýnıversıtetiniń tárbıe jáne áleýmettik máseleler jónindegi prorektory Sabyr Ibraev Qytaı men Reseı arhıvterinde 18-19 ǵasyrlarda bolǵan tolqýlar men kóterilister kezderinde naqaqtan naqaq jazalanǵan bozdaqtar jaıly derekter az emes, deı kelip tarıhshylardyń kóbine stalındik repressııa tóńireginen shyqpaıtynyn synǵa aldy. «Qyzyljar aqparat» JShS-niń dırektory Jarasbaı Súleımenov keńes odaǵy quramynda bolǵan kóp elder táýelsizdik alysymen qaharmandaryn izdeı bastaǵanyn, bizde bul baǵytta júıelilik jetispeıtinin, artynda izdeýshisi bar arystar ǵana aqtalǵanyn, qalǵandarynyń taǵdyry áli belgisiz kúıde jatqanyn, úrkinshilik, ashtyq jyldary shetelge aýǵan jurttyń búgingi»oralman» dep atalatyn urpaqtary qandaı mártebe ıelenýi kerek degen máseleni kóterse, zertteýshi ǵalym Zarqyn Taıshybaı ótken ǵasyrdyń 20-shy jyldary keńes ókimetine qarsy baǵyttalǵan Sibirdegi kóterilister Qazaqstandy, onyń ishinde teriskeıdi de sharpyǵanyn jetkizdi. Aqsaqaldar alqasynyń tóraǵasy Bolat Saǵyndyqov keńes arhıvinde kóptegen qaıshylyqtar kezdesetinin , onyń bir mysalyna ákesi atyldy jáne Qaraǵandy túrmesinde óldi degen eki qujat alǵanyn, áli kúnge deıin ákesiniń súıegi qaıda qalǵanyn bilmeıtinin kóldeneń tartty.
Basqa da sóıleýshiler Qazaq eliniń azattyǵy úshin sháıit ketken kaharmandar arýaǵyna bas ııý ári ımandylyq, ári adamshylyq, ári jaýapkershilik bolyp tabylatynyn, saıası baǵalaýlar Elbasy tarapynan únemi aıtylyp kele jatqanyn, «Rýhanı jańǵyrý» baǵdarlamasy sheńberinde ǵylymı-tanymdyq jumystardy keńinen óristetý qajet degen sheshimge keldi.
О́mir ESQALI,
«Egemen Qazaqstan»
Soltústik Qazaqstan oblysy
