Qazaqstan Respýblıkasynyń Ákimshilik quqyq buzýshylyq týraly kodeksine bet-álpetti tanýǵa kedergi keltiretin kıim-keshekti qoǵamdyq oryndarda kıip júrgeni; dinı birlestik basshysynyń, músheleriniń nemese dinı birlestiktiń osy dinı birlestiktiń jarǵysynda aıqyndalǵan maqsattar men mindetterdiń sheginen shyǵyp ketetin áreketter jasaǵany; azamattardyń shet memleketterde rýhanı (dinı) bilim alýy boıynsha elimiz zańnamasynyń talaptaryn buzǵany; dinı radıkalızm kórinisterin tanytqany; destrýktıvti dinı aǵymdarǵa jatatyndyǵyn kórsetetin syrtqy atrıbýttardy, kıim-keshekti qoǵamdyq oryndarda paıdalanǵany, kıip júrgeni jáne taratqany úshin ákimshilik jaýaptylyq kózdeıtin túzetýler engiziledi.
Zań jobasymen engiziletin jekelegen túzetýler dinı qyzmet týraly zańnamany buzǵany úshin taǵaıyndalatyn ákimshilik aıyppuldar mólsherin azaıtýǵa baǵyttalǵan.
Qylmystyq-atqarý kodeksine túzetýler Qylmystyq-atqarý júıesi komıtetine qylmystyq-atqarý júıesiniń mekemelerindegi sottalǵandarmen teologııalyq ońaltý jumysyn uıymdastyrý jónindegi qaǵıdalardy bekitý boıynsha quzyret berýdi kózdeıdi.
«Dinı qyzmet jáne dinı birlestikter týraly» zańǵa «destrýktıvti dinı aǵym», «dinı radıkalızm», «dinı birlestiktiń qatysýshysy (múshesi)» degen jańa uǵymdar engiziledi.
Zań jobasynda sonymen qatar memleket pen din arasyndaǵy ózara qatynastardy retteıtin, óńirlik dinı birlestikterdiń qyzmetine memlekettik baqylaýdy júzege asyratyn jergilikti atqarýshy organdardyń dinı qyzmet jáne dinı birlestiktermen ózara is-qımyl máseleleri jónindegi quzyretin aıqyndaıtyn túzetýler kózdelip otyr.
Komıtet otyrysynda «Eýrazııalyq ekonomıkalyq qoǵamdastyqqa múshe bir memlekettiń azamattary Eýrazııalyq ekonomıkalyq qoǵamdastyqqa múshe ekinshi memlekettiń aýmaǵynda eńbek qyzmetin júzege asyrý kezinde ushyraǵan óndiristegi jazataıym oqıǵalardy tergep-tekserý tártibi týraly kelisimdi ratıfıkasııalaý týraly» zań jobasy da qaraldy.
Zań jobasy Eýrazııalyq ekonomıkalyq qoǵamdastyqqa múshe memleketterdiń eńbek qaýipsizdigi jáne eńbekti qorǵaý salasyndaǵy yntymaqtastyqty nyǵaıtý bóligindegi kelisilgen áleýmettik saıasaty tujyrymdamasyn iske asyrý maqsatynda ázirlengen.
Kelisim EýrAzEQ-qa múshe memleketterdiń óndiristegi jazataıym oqıǵalar saldarynan zardap shekken azamattarynyń eńbektegi quqyqtaryn ózara qorǵaýǵa baǵyttalǵan.
Kelisimde EýrAzEQ-qa múshe bir memlekettiń azamattary EýrAzEQ-qa múshe ekinshi memlekettiń aýmaǵynda eńbek qyzmetin ýaqytsha júzege asyrý kezinde ushyraǵan óndiristegi jazataıym oqıǵalardy eńbekke ornalastyratyn memlekettiń zańnamasyna sáıkes tergep-tekserý tártibi belgilenedi.
Kelisimdi iske asyrý jazataıym oqıǵalardy tergep-tekserý kezinde óndiristegi jazataıym oqıǵa týraly biryńǵaı sıpattaǵy aktini paıdalanýǵa múmkindik beredi, onda jumysker, jumys berýshi jáne jazataıym oqıǵa týraly barlyq qajetti aqparat qamtylady.
Jazataıym oqıǵanyń tergep-tekserilýine baılanysty berilgen, EýrAzEQ-qa múshe eldiń biriniń aýmaǵynda resimdelgen qujattardy nemese olardyń rastalǵan kóshirmelerin EýrAzEQ-qa múshe basqa elder zańdastyrmaı qabyldaıdy.
О́ndiristegi jazataıym oqıǵadan zardap shekken jumyskerdiń densaýlyǵyna keltirilgen zııandy óteý eńbekke ornalastyrǵan memlekettiń zańnamasyna sáıkes júrgiziledi.
Komıtet tóraǵasy Birǵanym Áıtimova EýrAzEQ-qa múshe basqa elder aýmaǵyndaǵy kásiporyndarda óndiristik tájirıbeden ótip jatqan joǵary jáne orta oqý oryndary stýdentteriniń quqyqtary zańdy túrde qorǵalmaǵanyna nazar aýdardy. Depýtat soǵan baılanysty óndiristegi jazataıym oqıǵalardy tergep-tekserý eńbek sharty boıynsha qyzmet etetin jumysshyǵa ǵana emes, tájirıbeden ótýshi stýdentterge de qatysty bolýy múmkindigi týraly erejeni qarastyrýdy usyndy.
Zań jobasy Palatanyń qaraýyna jiberildi.
