Izgilikti sharaǵa Investısııalar jáne damý vıse-mınıstri Roman Sklıar, Qazaqstan Mashına jasaýshylar odaǵynyń basqarma tóraǵasy, Májilis depýtaty Meıram Pishembaev qatysty. «Búgin biz elordamyz – ásem qala Astananyń 20 jyldyǵy qurmetine Mashına jasaýshylar alleıasyn tartý etip otyrmyz. Qazaqta «Bir tal kesseń, on tal ek» degen ataly sóz bar. Búgingi ıgi bastamaǵa odaq quramyna kiretin barlyq kásiporyn qýana qoldaý kórsetti. Bizdiń bul bastamamyz aldaǵy jyldarda jalǵasyn tabatynyna jáne ózgelerge úlgi bolatynyna senimdimiz. Elimizdi kógaldandyryp, qorshaǵan ortany lastanýdan saqtap, ekologııany qorǵaý Qazaqstannyń árbir azamatynyń paryzy, mindeti dep bilemin! Alleıamyzdaǵy aǵashtar jaıqalyp ósip, halyqqa saıa bolsyn», dep júrekjardy lebizin bildirdi basqarma tóraǵasy. Al vıse-mınıstr Roman Sklıar mashına jasaýshylardyń eki kúndik forýmy mazmundy ótkenin atap ótti.
«Bıyl Qazaqstan mashına jasaýshylar forýmy altynshy ret ótip otyr. Eki kúnde seksııalyq jıyndar ótip, otandyq mashına jasaýdy ári qaraı damytýdyń praktıkalyq uıǵarymdary shyǵaryldy, salany damytýdaǵy eń ótkir jáne ózekti máseleler talqylandy. Mine, 2019-2030 jyldar aralyǵynda Qazaqstandaǵy mashına jasaý salasyn damytýdyń keshendi josparynyń jobasy tanystyryldy. Árıne bul nobaıly jospar. Biraq biz birigip, onyń kemshin tustaryn tolyqtyryp, jetkizip, qabyldap júzege asyratyn bolamyz. Al Astanada mashına jasaýshylar alleıasynyń ashylýy, bul osy salada túrli óndiristiń tizginin ustaǵan kásiporyndar men odaq arasynda yntymaqtastyqtyń, aýyzbirliktiń, uıymshyldyqtyń bar ekeniniń jarqyn kórinisi», dep atap ótti Roman Sklıar.
Qazaqstan mashına jasaýshylar odaǵynyń atqarýshy dıreksııasy dırektorynyń orynbasary Aıbek Qajkenovtiń aıtýynsha, budan bylaı odaq óz alleıasyn óz qamqorlyǵyna alyp, onyń abattandyrylýyn, tazalyǵyn, sýarylýyn baqylap otyrmaq. Keler jyldyń kókteminde enshilep alǵan 20 sotyq jerge taǵy da túrli aǵash kóshetterin otyrǵyzyp, bul alleıany shaǵyn saıabaqqa aınaldyrý josparda bar eken. Tipti mashına jasaýshy kásiporyndar óz qyzmetterimen baılanystyryp, máselen, temir jol óndirisindegiler vagonǵa uqsatyp, avtokólik jasaýshylar avtomobılge uqsatyp art-nysandar ornatý jaǵyn da oılastyrmaq. Aıtýlarynsha, kúzde qaıyń, sheten aǵashtaryn otyrǵyzǵan qolaıly, óıtkeni olar sýyqqa tózimdi keledi eken.
Atap óterligi, alleıa aǵymdaǵy jyldyń 20-21 kúnderi Astanada ótken Mashına jasaýshylardyń VI forýmy aıasynda ashyldy. Álemniń 20 elinen 1200-den astam adam qatysqan forýmdy Úkimettiń qoldaýymen Investısııalar jáne damý mınıstrligi, Qazaqstan mashına jasaýshylar odaǵy jáne bas seriktes «Samuryq-Qazyna» AQ uıymdastyryp otyr. Sonymen qatar forým sheńberinde stýdentter úshin bos oryndar jármeńkesi ótti. Plenarlyq jıyndarǵa Qaraǵandy, Pavlodar, Astananyń tehnıkalyq joǵary oqý oryndarynyń jetekshileri qatysyp, olar mashına jasaý salasyna qandaı kadrlar qajet jáne de qazirgi zamanaýı talaptardy eskere otyryp, túlekterdi qalaı tárbıeleý kerektigi týraly mańyzdy maǵlumattar aldy.
Sulýgúl BAKESOVA
