Halqymyzdyń bas kıimi ózge de túrki halyqtaryna da ortaq. Olar sol ulttyń tilinde túrlishe atalady. Mysaly, kelýshiler kórmeden qazaqtyń taqııasynan ózge azerbaıjannyń arahchynyn, tatardyń túbátáıin, ózbektiń dýppysyn tamashalady. Ulttyq qazaq dastarhanynda halqymyzdyń jent, qurt, baýyrsaq sekildi ulttyq taǵamdary kórsetilip ǵana qoımaı, kelýshiler aýyz tıdi. Sonymen qatar, baýyrsaq ta túrki halyqtarynda túrlishe pisirilip, túrlishe atalatynyn qostanaılyqtar men qala qonaqtary osy merekeden kórdi.
Shara Qazaq ulttyq mádenı kúni atalǵanymen, onda Qostanaı óńirin jeruıyq meken sanaǵan túrli ulystardyń da mádenıeti, óneri, dástúri qosa usynyldy. Olar birin-biri tolyqtyra tústi. Halqymyzdyń qolóneri jan-jaqtylyǵymen, baılyǵymen tańqaldyrady. Aǵash sheberi Tańatqan Bojaqov túrli aǵashtan jasalǵan ydystaryn usyndy. Tańatqan aǵanyń áńgimesi de jurtty uıytty. Ol ydystardy aǵashtyń túr-túrinen jasaıdy, ár aǵashtan qandaı ydys jasaýǵa bolatynyn, olardyń taǵamnyń buzylmaı saqtaıtyn qasıetterine deıin aıtyp berdi.
«Ertede usta atalarymyz nan salatyn, ydysty kók terekten jasaǵan. Kók terektiń nandy kógerip ketýden saqtaıtyn qasıeti bar. Osy sııaqty umytytylǵan turmystyq salttarymyz tolyp jatyr. Atalarymyz tek dalada ǵana emes, aǵashty, ormandy jerlerdi de jaılaǵan ǵoı, sonda aıtýly aǵash ustalary bolǵan» deıdi aǵash sheberi Tańatqan aǵaı.
Sharaǵa jınalǵandar qazaq jáne túrli ulystar ánderi men kúılerinen turatyn konsertti tamashalady.
Názıra Járimbet,
«Egemen Qazaqstan»
Qostanaı
