Kezdesýde taraptar eki jaqty qatynastardyń qazirgi máselelerin jáne ekonomıkanyń túrli sektorlaryndaǵy yntymaqtastyqty odan ári damytýdyń perspektıvalaryn talqylady.
– Elderimiz arasynda ózara senimge negizdelgen qarym-qatynas ornady. Biz Tájikstanǵa árdaıym kómek kórsetip, qoldaý bildirdik. Búginde osy yntymaqtastyǵymyzdy tereńdetip, ózara saýda-sattyqty ilgeriletýdi kózdep otyrmyz, – dedi Memleket basshysy.
Sonymen qatar, Nursultan Nazarbaev TMD elderi arasyndaǵy baılanystardy odan ári nyǵaıtý jáne ıntegrasııalyq úderisterdi keńeıtý úshin sharalar qabyldaýdyń mańyzdy ekenine nazar aýdardy.
Tájikstan Prezıdenti eki el arasynda qalyptasqan qatynastardyń strategııalyq sıpaty týraly aıtty.
– Qazaqstan – Tájikstannyń negizgi strategııalyq jáne ekonomıkalyq áriptesteriniń biri. Bizdiń saýda-ekonomıkalyq qatynastarymyz keńeıip keledi, – dedi E.Rahmon.
Tájikstan Prezıdenti Emomalı Rahmon Nursultan Nazarbaevtyń halyqaralyq arenadaǵy bedelin erekshe atap ótip, ekonomıkalyq jáne saıası turǵydan qoldaý kórsetkeni úshin Qazaqstanǵa rızashylyq bildirdi.
