Batys Qazaqstan oblystyq máslıhatynyń kezekti sessııasynda sóz alǵan Batys Qazaqstan oblystyq tilderdi damytý basqarmasynyń basshysy Aıgúl Myńbaeva Zelenov aýdanyndaǵy barlyq 22 aýyldyq okrýgte jáne aýdan ortalyǵynda osy másele talqylanyp, qoǵamdyq tyńdaý kezinde kópshilik tarapynan qoldaý tapqanyn aıtty. Kópshilik uıǵarymy boıynsha Zelenov aýdanyn Báıterek aýdany dep ataý usynylǵan.
Sheshim oblystyq máslıhat sessııasyna qatysqan depýtattar tarapynan qoldaý tapty.
Zelenov aýdany bólek ákimshilik qurylym retinde 1939 jyly qurylǵan, 1997 jyly aýdan quramyna Prıýralnyı aýdany kirdi, jalpy aýmaǵy – 7,4 myń sharshy shaqyrymdy quraıdy. Ortalyǵy Peremetnyı aýyly oblys ortalyǵy Oral qalasynan 38 shaqyrymda ornalasqan. Aýdanda 22 aýyldyq okrýg, 68 aýyldyq eldi meken bar, onda 2018 jyldyń 1 qańtardaǵy málimet boıynsha 57,2 myń adam turyp jatyr.
Aıta keteıik, Zelenov aýdany Batys Qazaqstan oblysynyń soltústiginde, Qazaqstan Respýblıkasynyń memlekettik shekarasyn boılaı ornalasqan. Reseı Federasııasynyń 3 oblysymen – Orynbor oblysynyń Pervomaı, Tashla aýdandarymen, Samara oblysynyń Bolshechernıgov aýdanymen jáne Saratov oblysynyń Ozınkı, Perelıýb aýdandarymen shektesedi.
Qazbek QUTTYMURATULY,
«Egemen Qazaqstan»
Batys Qazaqstan
