− Prezıdent bıylǵy Joldaýynda halyqtyń áleýmettik jaǵdaıy men turmys − tirshiligine qajetti máselelerdi túgel qamtyp shyqty. Ásirese, Elbasynyń eń tómengi jalaqyny arttyrý, «Pedagog mártebesi týraly» zań qabyldaý, bilim berý, medısınalyq qyzmet sapasyn arttyrý týraly tapsyrmalary mańyzdy. Munyń barlyǵy halyqtyń qyzyǵýshylyǵyn týdyryp, olar Joldaýdy zor yqylaspen qabyl aldy.
Bıylǵy Joldaýdyń taǵy bir ereksheligi — «О́z jerińdi tanyp bil» jańa bastamasynyń júzege asýy. Bul elimiz úshin ózekti másele - týrızmdi damytýǵa jaǵdaı jasaıdy, - dedi oblystyq Qobylandy memorıaldyq kesheniniń dırektory Azamat Qalmaǵambetov.
Depýtattardyń aıtýynsha, osyǵan deıin turǵyndardan pedagogtardyń sapalyq quramyn arttyrý, zeınetkerlikke shyǵarda jáne jalaqylaryn eseptegende ustazdardyń eńbek ótilin eskerý, shalǵaı eldi mekenderdi gazdandyrý, jumyssyzdyqty azaıtý týraly máseleler qozǵalyp, rýhanı qundylyqtar jóninde áńgime órbidi.
- Elbasy tapsyrmasyna oraı jastardyń jumyssyzdyq máselesin sheshý - strategııalyq mindet. Aqparat derekterine súıensek, elimizdegi 18 mıllıon halqymyzdyń 4 mıllıony jastar. Al olardyń 5 paıyzy jumyssyzdar qatarynda. Kásibı baǵdar berý sabaqtaryn mindetti oqý baǵdarlamasyna engizý - oqýshylardyń qandaı mamandyqtardyń suranysqa ıe bolatynyn anyqtap, qalaǵan mamandyǵyn ıgerýine jáne jastar arasyndaǵy jumyssyzdyq máselesin oń sheshýge yqpal etedi.
Sondaı-aq muǵalim - mekteptiń júregi, bala baǵbany. Ustazdarymyzdyń qoǵamdaǵy ornyn kóterý maqsatynda «Pedagog mártebesi týraly» zań Májilis qabyrǵasyna keledi. Ol pedagogtar arasynda úlken serpilis bolatyndyǵy anyq, - dep Májilis depýtaty Baqytgúl Hamenova bilim berý salasynda atqarylatyn isterge keńirek toqtaldy.
Májilis depýtaty Quralaı Qarakenniń aıtýynsha, medısına salasynda jalaqyny kóterý olardy oqytýdyń jańa ádisterine qaraı 10 myń ýchaskelik dáriger men 30 myń medbıkege qatysty bolmaq.
- Aǵymdaǵy jyly qaǵazsyz densaýlyq saqtaý júıesine kóshý boıynsha pılottyq joba aıaqtalýda. Ol pılottyq uıymdardyń 92 paıyzynda iske asyryldy. 2019 jyldyń 1 qańtarynan bastap barlyq emhanalar men aýrýhanalar medısınalyq qujattamany qaǵazsyz júrgizýge kóshedi dep josparlanýda, - dedi Quralaı Qaraken.
Osy kúni nurotandyq depýtattar ataqty tarıhı tulǵa, jońǵar men qalmaqtarǵa qarsy soǵysqan Qobylandy batyrdyń memorıaldyq kesheni men Jırenqopa orta mektebinde boldy.
Qazaqstannyń kıeli jerler kartasyna engen memorıaldyq keshenge ótken jyly jóndeý jumystary júrgizildi. Ári aýdan ortalyǵyna Qobylandy batyr, Isataı batyr eskertkishteri qoıyldy, Máńgilik el, Otan ana, Altaı batyr, Álııa skveri salyndy. Ekinshi dúnıejúzilik soǵysqa qatysqan 2 400 qobdalyq azamatqa arnap «Uly dala darabozdary» atta taqta ornatyldy. Munyń bári «Rýhanı jańǵyrý» baǵdarlamasy aıasynda atqarylǵan jumys. Bul kezdesý ári qaraı jalǵasady. Májilis depýtattary 27 qazanǵa deıin Yrǵyz, Mártók, Baıǵanın, Hromtaý, Áıteke bı, Muǵaljar, Alǵa aýdanyndaǵy aýyl turǵyndarymen kezdesip, jer-jerdegi jaǵdaımen tanysady
Temir QUSAIYN,
«Egemen Qazaqstan»
