Sońǵy jyldary elimizdegi perzenthanalar janynan ashylyp jatqan sımýlıasııalyq ortalyqtar dárigerlerdiń tájirıbelik daǵdylaryn jetildirýge baǵyttalǵan. Osyndaı taǵy bir ortalyq Atyraýdaǵy qalalyq perzenthanada jumysyn bastady. 15 stansadan turatyn ortalyqta jas dárigerlermen birge uzaq jylǵy eńbek ótili bar mamandar da túrli manıpýlıasııalar jasaıdy. Mysaly, merziminen buryn týylǵan sábılerdi, bosanǵan áıelderdi reanımasııalaýda, bosanýǵa járdemdesýde, týýdy ımıtasııalaýda qyzmetkerler arnaıy medısınalyq mýlıajdardy paıdalanady.
Oblystyq densaýlyq saqtaý basqarmasynyń basshysy Mánshúk Aımurzıeva robottardyń adam aǵzasyna barynsha jaqyndatylǵan, emosııalardy bildire alatyndyǵyn, dybys shyǵaryp, sóıleıtindigin aıtady. «15 robottandyrylǵan stansııaǵa 200-ge jýyq jabdyq satyp alyndy. Sol arqyly aımaqtaǵy medısınalyq qyzmetkerlerdi tájirıbelik daǵdylarǵa oqytyp, jedel járdem kelgenge deıin alǵashqy kómek kórsetýde paramedıkterdi daıyndaýdy maqsat ettik», deıdi.
Sımýlıasııalyq ortalyqta 12 jattyqtyrýshy-dáriger neonatolog, anestezıolog, reanımatolog, akýsher-gınekolog jumys isteıdi. Jyl sońyna deıin oblystyń barlyq medısınalyq qyzmetkerlerin, 200 paramedısınalyq mamandy biliktilik arttyrý kýrstarynan ótkizý josparlanǵan.
Jańa ortalyqtyń jumysymen tanysqan oblys ákimi Nurlan Noǵaev oqý jattyǵý orny tek dárigerlerge ǵana emes, túrli kásiptegi adamdarǵa, aıtalyq polısııa qyzmetkerlerine, órt sóndirýshilerge, dene shynyqtyrý muǵalimderine, jattyqtyrýshylarǵa jáne memlekettik qyzmetshilerge de paıdaly ekenin atap ótti. «Bizdiń mindetimiz – barlyq dárigerlerdi árqaısysy óziniń arnaıy daǵdylaryn avtomattandyrýǵa jetkizýi úshin osy ortalyqtan ótkizý. Maqsatymyz – adamı faktordy azaıtý, óńirdegi barlyq dárigerler óz salasynyń mamany bolýy tıis», dep tapsyrdy Nurlan Noǵaev densaýlyq saqtaý basqarmasynyń basshysyna.
Mundaı ortalyq Atyraý medısınalyq kolledjiniń janynan da ashylǵan. Onda stýdentter bes stansada kómek kórsetý úshin tájirıbelik daǵdylardy jınaqtaıdy.
Atyraýda ana men bala densaýlyǵy únemi nazarda bolǵanyna qaramastan, perzenthanada kóz jumý oqıǵalary áli de bar. Jańa sımýlıasııalyq ortalyq ana men bala óliminiń kórsetkishin nóldik deńgeıge jetkizýge septigin tıgizse jaqsy.
Baqytgúl BABASh,
«Egemen Qazaqstan»
ATYRAÝ
