Kezdesý barysynda álemde densaýlyq saqtaý júıesin damytýǵa, medısınalyq qyzmetter men bilimniń sapasy men qoljetimdiligin arttyrýǵa, sondaı-aq densaýlyq saqtaý ınfraqurylymyn jetildirý aıasynda zamanaýı sıfrlyq tehnologııalardy engizýge qatysty ózara is-qımyl jáne ortaq tásilderdi ázirleý máseleleri talqylandy.
B. Saǵyntaev T. Gebreıesýs myrzaǵa Alǵashqy medısınalyq-sanıtarlyq kómek jónindegi Almaty deklarasııasy qabyldanǵan kúnnen beri 40 jyl ótýine oraı ótkizilgeli jatqan Jahandyq konferensııany uıymdastyrýǵa kórsetken qoldaýy úshin alǵys aıtyp, osyndaı mańyzdy qorytyndy qujat qabyldanatynyna senim bildirdi.
1978 jyly Almaty qalasynda álemdegi densaýlyq saqtaý salasyn damytýǵa eleýli áser etken Alǵashqy medısınalyq-sanıtarlyq kómek jónindegi Almaty deklarasııasy qabyldandy. Atalǵan aýqymdy sharanyń arqasynda Qazaqstannyń álemdik densaýlyq saqtaý qoǵamdastyǵy aldynda bedeli artty.
Elimiz Dúnıejúzilik densaýlyq saqtaý uıymyna 1992 jyldyń 19 tamyzynda, uıymnyń 180-múshesi bolyp qosyldy. Qazaqstan geografııalyq jaǵynan DDSU-nyń Eýropalyq aımaǵyna jatady. Búginde DDSU músheleriniń sany 194 memleketke jetti.
Qazirgi tańda Qazaqstan men DDSU arasynda tyǵyz seriktestik qatynastar qalyptasqan. DDSU sharalary aıasynda juqpaly emes jáne juqpaly aýrýlarmen, ásirese polıomıelıtpen, týberkýlezben kúres jáne halyqaralyq densaýlyq saqtaý erejelerin jan-jaqty nasıhattaý boıynsha qarqyndy jumys atqaryldy. DDSU ana men bala densaýlyǵyn qorǵaý, týberkýlez jáne AITV/JITS aldyn-alý jáne baqylaý, sanıtarlyq qyzmet kórsetýdi jaqsartý sekildi memlekettik saıasatty júzege asyrýda Qazaqstanǵa turaqty tehnıkalyq jáne konsýltasııalyq kómek kórsetip keledi. Densaýlyq saqtaý salasyndaǵy turaqty damý boıynsha kózdegen maqsattarǵa jetý úshin kóp jumys jasalýda.
