Jańa júıe jolaýshylardan túsken qarjynyń naqty kólemi men onyń qaıda jumsalatynyn anyqtaýǵa septigin tıgizedi. Buǵan deıin Almaty, Astana sekildi elimizdiń iri qalalarynda qolǵa alynǵan joba qoǵamdyq kólik salasyndaǵy máselelerdiń kúrmeýin sheshýge yqpal etken-di.
Atyraýda smart karta saýda ortalyqtarynda, temir jol vokzalynda, shaǵyn aýdandardyń sońǵy aıaldamalarynda satylyp jatyr, avtobýs kondýktorlarynan da alýǵa jáne shotty toltyrýǵa bolady.
Bir kartanyń quny – 300 teńge. Onyń shotyn tasymaldaýshylar arqyly, satý núktelerinde, Qiwi-termınaldarda jáne «SmartQala» mobıldi qosymshasy arqyly tolyqtyrýǵa bolady. Kóliktegi smart karta, bank kartasy, NFC qoldanbasy bar smartfon, QR kody, QR kartasy, SMS habarlamalar, Bluetooth, messendjer jáne jolserikke qolma-qol tólem tóleý syndy toǵyz túrli tólem bar.
«Ѕmart –TKSh» JShS ókili Erlan Nurlanuly: «SmartQala» mobıldik qosymshasy arqyly tólemniń barlyq túrlerin jasaýǵa jáne karta teńgerimin baqylaýǵa bolady. Endi bul qosymshany barlyq kommýnaldyq tólemderdi, jol aqylaryn jáne salyqtardy tóleýge paıdalanýdy josparlap otyrmyz. Jyl aıaǵyna deıin qosymshada avtobýstardyń kelý ýaqytyn, baqylaý qyzmetin iske qosamyz. Jolaýshy aıaldamada turyp, jaqyn mańdaǵy qoǵamdyq kóliktiń kelý ýaqytyn kóre alady», deıdi.
Qazir qaladaǵy 54 avtobýs mobıldi termınalmen jabdyqtalǵan. Barlyq 200 avtobýsty jabdyqtap, QR-kodtar berý jumysy jaqynda aıaqtalady.
– Atyraý qalasynyń qoǵamdyq kólikterinde elektrondy bılet júıesin engizý oń nátıje beredi, bul qozǵalystyń ashyqtyǵyn qamtamasyz etedi, azamattardyń áleýmettik sanattary boıynsha statıstıkany júrgizýge, bıýdjetke salyq túsimderin arttyrýǵa, qoǵamdyq kólikterdi baqylaýǵa jol ashady, – deıdi Erlan Nurlanuly.
Baqytgúl BABASh,
«Egemen Qazaqstan»
ATYRAÝ
