Keshe tórt salmaq dárejesi boıynsha básekeler ótti. 55 kılo salmaqtaǵy Janserik Sársenbıev ıordanııalyq Mustafa Sultan Alkýaden (5:0) aılasyn asyrǵanymen, kelesi aınalymda bıylǵy jylǵy Azııa chempıony japonııalyq Shota Tanokýraǵa (0:6) jol berdi. 63 kılo salmaqtaǵy Aıdyn Nuǵymanov jastar arasyndaǵy álem men Eýropa birinshilikteriniń júldegeri, ýkraınalyq Lenýr Temirovten (1:11) oısyraı utyldy. Osylaısha, ekeýi de jarys jolynan shyǵyp qaldy.
72 kılo salmaqtaǵy Demeý Jadyraevqa jarysty birden 1/8 fınaldan qandasymyz ózbekstandyq Aram Vardanıannan (3:2) basym túskenimen, shırek fınalda óziniń syralǵy qarsylasy Frank Shteblermen kúsh synasty. Dál osy balýannan ol byltyrǵy jylǵy álem chempıonatynyń aqtyq synynda jeńilgen bolatyn. Bul joly da jeńis nemis sportshysynyń ýysynda ketti (6:10). Al 82 kılo salmaqtaǵy Maqsat Erejepov chehııalyq Petr Novakpen (3:1) pen marokkalyq Zeıt Oýagarmdy (14:5) jeńgegenimen, kelesi kezeńde 2014 jylǵy álem jáne Eýropanyń eki dúrkin chempıony vengrııalyq Petr Bachıge ese jiberdi.
Desek te Demeý men Maqsattyń jolyn bógegen balýandar fınalǵa deıin jetkendikten, qos qandasymyzdyń qola medal úshin talasýǵa áli de múmkindikteri bar. Endi Qazaqstannyń qos óreni jubanysh básekelerinde baq synaıdy.
Sondaı-aq, búgin grek-rım kúresinen úsh salmaq dárejesi boıynsha irikteý syndary bastalady. 60 kılo salmaqtaǵy Aıdos Sultanǵalı Eýropa chempıonatynyń qola júldegeri, ýkraınalyq Dmıtrıı Symbalıýkpen beldesedi. 67 kılo salmaqtaǵy Meıirjan Shermahanbet álem birinshiliginiń qola júldegeri, túrkııalyq Iýksel Ataqanmen aıqasady. Al 87 kılo salmaqtaǵy Azamat Qustybaev qurlyqtyq dodanyń kúmis júldegeri, reseılik Bekhan О́zdoevpen sheberlik baıqasady.
Ǵalym SÚLEIMEN,
«Egemen Qazaqstan»
