«Nur Joly» — Elbasy N. Nazarbaevtyń «Nurly jol» baǵdarlamasy aıasynda júzege asyrylǵan «Batys Eýropa — Batys Qytaı» aýqymdy jobasynyń sońǵy qorytyndysy jáne Ortalyq Azııa aýmaǵyndaǵy eń úlken ótkizý pýnkti. Qytaıdyń «Beldeme jáne jol» bastamasymen úılesken Prezıdenttiń memlekettik baǵdarlamasy eń aldymen, Uly Jibek jolyn jańǵyrtýdy kózdeıdi. Almaty oblysynyń Panfılov aýdanyndaǵy ótkizý pýnkti arqyly Qytaı Halyq Respýblıkasymen aýyr jáne jeńil avtokólikter, sondaı-aq jolaýshylar avtobýstary shekaradan ótedi.
B. Saǵyntaev ótkizý pýnktiniń jumys oryndaryn qarap, negizgi tehnıkalyq áleýetimen tanysty. Bul aýqymdy zamanaýı kólik-logıstıkalyq ortalyqtyń qurylysy 2017 jyly bastalǵan, al osy jyldyń 27 qyrkúıeginde ashylý saltanaty ótti. Jobanyń qurylysy memlekettik-jekemenshik áriptestik qaǵıdaty boıynsha iske asyryldy.
«Nur Joly» ótkizý pýnkti tehnıkalyq jabdyqtalý, kólik quraldarynyń ótý jyldamdyǵy jáne baqylaý júıesin engizý boıynsha teńdessiz bolyp sanalady. Toqtaýsyz jumys isteıtin, avtomattandyrylǵan baqylaý jáne tirkeý júıesi bar zamanaýı qural-jabdyqtardyń arqasynda júk kólikterin kedendik jáne shekaralyq rásimdeý ýaqyty 40 mınýtqa deıin qysqartylady.
QR Qarjy mınıstrligi Memlekettik kirister komıteti tóraǵasynyń orynbasary G. Amrınniń aıtýynsha, keshenniń jalpy qurylymy kólik qozǵalysynyń eki baǵytynda jumys kúnderi 2500 kólik quralyn ótkizýge qaýqarly. Onyń ishinde 2200 júk kóligi, 300 jolaýshy kóligi bar. Bul tranzıttik aǵyndardyń edáýir ulǵaıýyna múmkindik berdi. Bolashaqta jańa pýnkt táýligine 5000 kólikke deıin ótkize alatyn bolady. Mundaı ótkizý pýnkti bar iri saýda dáliziniń paıda bolýy elimizdiń ınvestısııalyq tartymdylyǵyn arttyryp, óńirlik ekonomıkanyń damýyna qýatty serpin bermek.
Sondaı-aq, Baqytjan Saǵyntaev shekara mańy yntymaqtastyǵynyń halyqaralyq ortalyǵynyń jumysymen de tanysty. Joba Qazaqstan men Qytaı memleket basshylarynyń bastamasymen júzege asyrylýda. Maqsat — eki el arasyndaǵy saýda-ekonomıkalyq, ınvestısııalyq, ǵylymı-tehnıkalyq jáne mádenı yntymaqtastyqty damytý.
«Qorǵas» ShYHO jalpy aýmaǵy 560 gektar bolatyn eki memlekettiń shekaralas aýmaqtarynda ornalasqan jáne memlekettik shekara arqyly ótetin «Arnaıy ótkel» arqyly qosylǵan qazaqstandyq jáne qytaı bólikterinen turady. Jobanyń biregeıligi — Ortalyqtyń aýmaǵynda adamdar, taýar jáne kólik quraldary vızasyz erkin qozǵala alady.
«Qorǵas» ShYHO prezıdenti Q. Jazınniń aıtýynsha, eki el turǵyndary tarapynan 2012 jyldyń sáýir aıynda ashylǵan ortalyqqa degen qyzyǵýshylyq jyl saıyn artyp keledi. Halyqaralyq ortalyqtyń aýmaǵyna kirý tártibin jeńildetý úshin biraz jumystar atqaryldy. Máselen, 2016 jyldyń qarasha aıynan bastap, azamattarǵa «Qorǵas» ShYHO aýmaǵyna kirýge tek jeke kýálik pen balanyń týý týraly kýáligi (bir ata-anasy janynda bolǵan jaǵdaıda) ǵana kerek. 2018 jyldyń qańtarynan qyrkúıek aıyna deıin eki jaqtan kelýshilerdiń jalpy sany 1 mln adamnan asqan.
Qazirgi tańda «Qorǵas» ShYHO» AQ aýdany 236 ga bolatyn rezervtegi aýmaqtardy qosýdy qarastyratyn qurylystyń bas josparyna túzetýler engizý jumystaryn aıaqtady. Jańa bas josparǵa sáıkes, kópfýnksııaly saýda úılerin jáne halyqaralyq iskerlik yntymaqtastyqqa arnalǵan ortalyqtardy, sondaı-aq, mádenı almasý oryndaryn, bilim jáne ǵylymı oqytý ortalyqtaryn, sporttyq-saýyqtyrý ınfraqurylymy bar demalys oryndaryn salý josparda bar.
«Qorǵas» ShYHO málimetine sáıkes, Ortalyq aýmaǵynda jalpy quny shamamen 356 mlrd teńge bolatyn 27 ınvestısııalyq nysan bar. Paıdalanýǵa berilgen saýda úıleriniń jalpy aýdany 24 663 m2 quraıdy. 2018 jyldyń sońyna qaraı aýdany shamamen 40 000 m2 bolatyn 2 ınvestısııalyq nysannyń qurylysyn aıaqtaý kózdelgen.
Budan ózge «Qorǵas» ShYHO-nyń qazaqstandyq bóliginde naqty salyq jeńildikteriniń paketi bar arnaıy ekonomıkalyq aımaq qurylǵan. ShYHO-ǵa AEA mártebesin berý kásipkerlik qyzmetti damytýǵa jáne ınvestısııalar tartýǵa qolaıly jaǵdaılar jasaıdy. «Qorǵas» ShYHO AEA-nyń bolashaq qatysýshylary áleýmettikten ózge, negizgi salyqtardy tóleýden bosatylady. Osy jáne basqa da jeńildikter men artyqshylyqtar qazaqstandyq jáne sheteldik qatysýshylar úshin de qoljetimdi bolady. ShYHO-da taýar aınalymy sıfrlandyrylýda. Bul keden baqylaýy prosesterin avtomattandyrýǵa jol ashady.
Qazirgi tańda qazaqstandyq ınvestorlar úshin ınvestısııalyq nysandarda jumystaryn júzege asyrý maqsatynda baqylaý-ótkizý pýnkterinde táýliktik jumys rejımi máselesi sheshilgen. Qazaqstan men Qytaı arasyndaǵy shekara mańy saýdasy men týrızmdi odan ári jandandyrýǵa kómektesý maqsatynda qytaıdyń baqylaý-ótkizý pýnktinde 14 saǵattyq jumys rejımi iske qosylǵan.
