Aqparattyq top músheleriniń aıtýlaryna qaraǵanda Ahmet Baıtursynov atyndaǵy til bilimi ınstıtýty jańa alfavıtke negizdelgen qazaq tili emlesiniń erejesin qurastyrypty.
«Qazaq tili álipbıin latyn grafıkasyna kóshirý jumystarymen ulttyq komıssııa aınalysady. Latyn qarpine kóshirý jospary kezeń-kezeńmen atqarylyp, 2025 jyly tolyq aıaqtalady. Ulttyq komıssııa janynan orfografııalyq, termınologııalyq, ádistemelik, tehnıkalyq-aqparattyq jumys toptary qurylǵan», dedi jınalǵandar aldynda sóılegen sózinde L. Gýmılev atyndaǵy EUÝ qazaq til bilimi kafedrasynyń professory Bekjan Ábdýálıuly. Kelesi jyldan bastap mektepaldy synyptardan 11 synypqa deıingi oqýlyqtar birindep saraptamadan ótedi. Mamandardyń biliktiligin arttyrý osyndaı jańashyldyqtarmen úılestiriledi.
Semınar aıasynda latynǵa kóshý, alda turǵan problemalar, ony sheshýdiń joldary, qazaq tiliniń emle erejesine baılanysty máseleler talqylandy. Jıynǵa qatysýshylardy adam esimderiniń jazylýy, kırıll alfavıtinde ketken olqylyqtardy sheshý joldary erekshe qyzyqtyrdy.
Oblystyq tilderdi damytý basqarmasynyń bólim jetekshisi Ásem Súleımenova latyn grafıkasyna birtindep kóshý sharalary jaıly baıandady. Latyn qarpin oqytatyn kýrs jumys isteıdi. Oǵan kez kelgen adam erikti túrde qatysa alady. Qazaq álipbıin kırıllısadan latynǵa kóshirýdiń qajettiligi men mańyzy jer-jerlerde túsindirilýde. «Ivýshka» balabaqshasynyń meńgerýshisi Gúlbaný Qasenova búldirshinder latyn álipbıin úsh aıdan beri ıgerip jatqanyn jetkizdi.
Aqparattyq toptyń músheleri jumys saparlaryn Aqqaıyń, Taıynsha aýdandarynda jalǵastyrdy.
О́mir ESQALI,
«Egemen Qazaqstan»
Soltústik Qazaqstan oblysy
