Astanalyq jáne kókshetaýlyq zııatkerler bir aptaǵa sozylatyn shara barysynda aımaqtyń florasy men faýnasy jaıly aqparat alý úshin Mańǵystaý oblystyq botanıkalyq baǵyna barsa, oblystyq tarıhı-ólketaný jáne «Otpan taý» tarıhı-mádenı kesheniniń murajaıynda túbek tarıhymen tanysady. Sonymen qatar, Aqtaý qalasynda da ekskýrsııa uıymdastyrylmaq.
Joba baǵdarlamasyna sáıkes, oqýshylar Mańǵystaýdaǵy HII-HIII ǵasyrlardaǵy sáýlet óneri eskertkish sanalatyn Shaqpaq ata jer asty meshitine bardy jáne aımaqtaǵy eń kórkem orynnyń biri Aqespe jyrasynyń (alqap) sulýlyǵyna kýá boldy. Kezinde halyqty jaý shabýylynan qorǵaýǵa shaqyrǵan Otpantaýdaǵy «Uran otyn» kórip, onyń búgingi beıbit ómirdegi mańyzymen tanysty. О́lkeniń vızıtti kartasyna aınalǵan Sherqala taýy men qos ǵashyq Aqbóbek pen Qaıyp eskertkishine baryp, ańyz-áńgimeler tyńdaý josparlandy.
Mańǵystaý tylsym jerlerimen ǵana emes, erekshe tulǵalarymen de tanymal. Túbektiń tarıhı tulǵalary Isa-Dosan batyr eskertkishin kórip, Fort-Shevchenko qalasyndaǵy etnografııalyq murajaıynan jergilikti halyqtyń turmysy týraly málimet alyp, sonymen qatar, sýretshi, ýkraın aqyny Taras Shevchenkonyń mýzeıine baryp aıdaýdaǵy ómiri týraly bildi, basqa esh jerde kezdespeıtin málimetter men eksponattar qoryn kórdi.
- «Týǵan elge taǵzym» jobasyna qatysatyn balalar ózderi kórip qana qoımaı, ony sanasynda qorytý maqsatynda, kúndelik toltyryp, alǵan áserin, málimetterin tizip otyrady. Bul balanyń týǵan jerge degen súıispenshiligin arttyryp qana qoımaı, alǵan málimetterdi jadynda saqtaýǵa jaqsy múmkindik, - deıdi mektep dırektorynyń tárbıe isi jónindegi orynbasary Altynzer Ihsanova.
О́lketaný-zertteýshilik ekspedısııasy boıynsha qorytyndy keshte Ábishtanýshy ǵalym Janbıbi Senbaıqyzy Dúısenbaevamen kezdesý uıymdastyrylyp, zııatkerler óńirdegi qudyqtar týraly, jer-sý ataýlary týraly, Ábish Kekilbaevtyń ómiri men shyǵarmashylyǵy týraly kóptegen zertteýlerdi tyńdaldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
