Kókpar, aýdaryspaq, qyz qýý, teńge ilý, jamby atý, alaman báıge,top báıge, ushqyr báıge, jorǵa jarys, tazy jarysy sekildi ulttyq sport túrlerinen júırikterdi anyqtaǵan jarystyń júlde qory – 43 mln teńge boldy. Sharaǵa general-maıor, Ulttyq sport túrleri qaýymdastyǵynyń qurmetti prezıdenti Qaırat Satybaldy, Ulttyq sport túrleri qaýymdastyǵynyń prezıdenti, Májilis depýtaty Bekbolat Tileýhan qurmetti qonaq retinde qatysty. Týrnırdi ashqan oblys ákimi Nurlan Noǵaev shara Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylǵanyn aıta kelip, Indonezııada ótken Parazııa oıyndarynda júldeger atanyp kelgen atyraýlyqtardy marapattady.
Ulttyq sport túrleri qaýymdastyǵynyń qurmetti prezıdenti Qaırat Satybaldy Qazaqstannan tys jerlerde ulttyq sport túrleriniń tanymaldylyǵyn arttyrý jáne el ishinde nasıhattaý assosıasııasynyń aldynda turǵan mindetter ekenin atap ótti. «Atyraý 7 memleketten sportshylardy jınap, Astananyń 20 jyldyǵyna oraı osyndaı aýqymdy shara uıymdastyryp otyrǵanyna qýanamyn. Oblys basshylyǵy tarapynan ata dástúrin damytyp, álemdik arenada nasıhattaýda qoldaý kórsetilip otyr», – dedi Qaırat Satybaldy.
Jarys bolǵan Almaly aýyly naǵyz merekeniń ordasyna aınaldy. Aqshańqan kıiz úıler qurylyp, kórermenge ulttyq taǵamdar usynyldy. Jarys qorytyndysynda úzdik kókparshyǵa «Altyn qamshy» arnaıy syılyǵy berildi. Al 31 shaqyrym qashyqtyqta márege alǵash jetken qatysýshy 5 mln teńge kólemindegi bas júldeni jeńip aldy. Barlyq sport túrleri boıynsha jeńimpaz atanǵandar da, qatysýshylar da syı-qurmetke ıe boldy.
Baqytgúl BABASh,
«Egemen Qazaqstan»
Atyraý
