Bul baıqaýdy «Perishte» qaıyrymdylyq qory uıymdastyrǵan. Qor 2011 jyldan beri talantty balalar men jastardy qoldaýmen aınalysyp keledi. Búgingi baıqaýdyń maqsaty – múgedek balalardy qoǵamnyń mádenı ómirine tartý, áleýmettik turmysqa beıimdeý eken.
Baıqaýǵa qatysýǵa Batys Qazaqstan oblysynyń aýdandarynan jáne Atyraý qalasynan da nıet bildirgender kóp boldy. 4 pen 17 jas aralyǵyn qamtyǵan saıys birneshe fotosessııadan turdy. Baıqaýdyń fınaldyq bólimine 17 bala ótti. Hadısha Bókeeva atyndaǵy Batys Qazaqstan oblystyq qazaq drama teatrynyń sahnasynda qorytyndylanǵan sońǵy synaqta júzden júırik shyqqan jeńimpazdar anyqtaldy.
- Kishkentaı fotomodelder bul saıysqa bar yntasymen qatysty. Jan tolqytar sátter de boldy. Osy baıqaýǵa qatysyp jatqan bir balanyń ákesi keshe ǵana aýyr naýqastan dúnıe saldy. Biraq marqum sońǵy sózinde ulyna saıystan qalmaýyn ótinip, jeńis tilep ketken eken. Tipti jerleý rásiminiń ýaqytyn da konkýrstan keıinge qaldyrǵan. Qoǵam ómirinen kóbine shet qalyp júrgen mundaı jandarǵa kóptiń kóz aldynda, sahnada óner kórsetý ońaı emes qoı. Olar bárin jeńip shyqty, - deıdi baıqaýdy uıymdastyrýshy Janar Dáýletova.
Sonymen, qyzdar arasynda eń kishkentaılar tobynda 4 jasar Anelııa, orta topta 14 jasar Krıstına, 15-16 jastaǵy eresekter tobynda Ásem jáne egiz Alena men Veronıka bas júldege ıe boldy. Er balalar arasynda 11 jasar Aıbergen men 17 jasar atyraýlyq Evgenıı jeńimpaz tanyldy.
Aıtpaqshy, jas modelderdiń fotosessııasyn jasaǵan – oraldyq jas fotograftar bolatyn. Eń sátti kórinis, eń myqty sýret úshin olar da ózara óner básekesine tústi. Sóıtip, Ekaterına Mochalova bas júldeni, Sherhan Edekeshev – 1 oryndy, Abylaı Ǵalımat – «eń kreatıv fotograf» ataǵyn ıelenip, Meıirbek Tájquranov alǵys hat aldy.
Baıqaýdyń Gran-prı júldesi men 1 báıgesin alǵan fotomodelder Parıj qalasyndaǵy halyqaralyq sán baıqaýyna joldama aldy. Olar sondaı-aq «Edelweiss» art-stýdııasynda modelıng pen etıket boıynsha tegin sabaq alady.
Qazbek QUTTYMURATULY,
«Egemen Qazaqstan»
Batys Qazaqstan
