Jaqynda «Hertfordshire Press» brıtandyq baspa úıi Sáýle Dosjannyń «The tragedy of a bastard» jáne «My own strange heart» atty úzdik novellalary engen proza jınaǵynyń aǵylshyn tilindegi nusqasyn Halyqaralyq «Býker» ádebı syılyǵyna usyndy. Jazýshynyń shyǵarmalar jınaǵyn aǵylshyn tiline Elden Sarybaı tárjimalady. Bul asa bedeldi ádebı syılyqtyń short-paraǵyna ilingen jeti úmitkerdiń árqaısysy 1000 fýnt-sterlıng kóleminde syıaqy alady. Halyqaralyq Býker syılyǵynyń short-paraǵyna ilingen qalamgerlerdiń tizimi áli jarııa bolǵan joq. Biraq álem oqyrmandary bedeldi syılyqtyń fınalısteri kimder bolýy múmkin dep, óz joramaldaryn da usynyp úlgergen.
Aıta keteıik, jeńimpaz kitapqa 50 myń fýnt-sterlıng kóleminde syıaqy berilip, bul soma avtor men aýdarmashyǵa teń bólinedi.
Jazýshynyń buryn eshqaıda jaryq kórmegen «The tragedy of a bastard» («Kórdemsheniń qasireti») hıkaıaty brıtandyq resenzentter tarapynan jaqsy pikirge ıe bolǵan. Tanymal ádebı synshy Kerolaın Ýolton «Our dear ancestors said honour is more valuable than life» («Bizdiń qasıetti babalarymyz ómirden de qymbat – ar ekenin aıtyp ótken») resenzııasynda «Kórdemsheniń qasireti» hıkaıatynyń ıdeıasy tereń ekenin atap ótedi. Hıkaıat jeti atadan qan aralastyrmaý saltyn ustanyp kelgen tekti halyq urpaqtarynyń usaqtalyp, azyp bara jatqany týraly ult taǵdyryna qatysty úlken problemany kóteredi.
Móldir qyz ben Nurjan atty nekesiz týǵan jas jigittiń mahabbaty synalar alańda – salt-dástúr, otbasy qundylyqtaryna baılanysty kúrmeýi qıyn máseleler, basy ashyq daý men uzaqqa sozylyp, shyǵarma aıaqtalǵanda da sońǵy núktesi qoıylmaǵan tartysqa toly eki otbasynyń óz ishi, oshaq basy.
Hıkaıattaǵy problema – «kórdemshe bala» – Nurjannyń anasy Márzııanyń «otyzdy ortalaǵansha oń jaqta otyryp qalýynan» týyndaıdy.
«Kórdemsheniń qasiretinen» basqa Sáýle Dosjan sheteldik oqyrmanǵa óziniń erekshe týyndysy «My own strange heart» («О́geı júrek») shyǵarmasyn da usynǵan. Bul – Qazaqstanda alǵash ret júrek almastyrý otasyn jasaǵan hırýrg dáriger – Iýrıı Pıa men aýrý Jánibek Ospanovtyń basynan ótken oqıǵaǵa qurylǵan dúnıe. Bul shyǵarma Qazaqstan medısınasynyń jetken jetistigin sóz etedi. Oqıǵa óte tartysty órbıtindikten oqyrmandy birden baýrap alady.
Sáýle Dosjan esimi kózi qaraqty oqyrmanǵa jaqsy tanys, ol – birneshe kitaptyń avtory, belgili aqyn, jazýshy. Halyqaralyq áıel jazýshylar gıldııasynyń (International Women Writing Guild) jáne Eýrazııa shyǵarmashylyq gıldııasynyń (ECG) múshesi.
Sáýle Dosjan Shvesııanyń Stokgolm qalasynda ótken «Open Eurasian Literature Festival and Book Forum-2017» baıqaýynda júldeli III oryndy ıelengen.
Anar QABYLQAQ,
ádebıettanýshy
