Jasóspirimder, jastar jáne eresekter arasynda ótken jarysta Qazaqstannyń týy astynda birneshe komanda óner kórsetti. Solardyń arasynan Almatynyń «Sarbaz» klýbynyń ókilderi asqan sheberlik tanytyp, kópshiliktiń qoshemetine bólendi. Tanymal jekpe-jek sheberi Qurmet Núkenov jetekshilik etetin aıtýly komanda músheleri 4 altyn, 3 kúmis jáne 6 qola medalǵa ıelik etti. Barlyǵy – 13 júlde.
Bishkektegi básekede 70 kılo salmaqtaǵy Erkin Begenov (2001 jyly týǵan) pen Dosjan Kenjebaev (2000 jyly týǵan), 84 kılo salmaqtaǵy Asyljan Jeńis (2000 jyly týǵan) jáne 120 kılo salmaqta Beknur Bekqululy (1999 jyly týǵan) birde-bir qarsylasyna bet qaratpaı, jeńis tuǵyrynyń eń bıik satysyna kóterildi. Sondaı-aq, 52 kılo salmaqta Ǵanı Nurǵazy (2002 jyly týǵan), 54 kılo salmaqta Almat Uzaq (2004 jyly týǵan) jáne 110 kılo salmaqta Rýslan Imanbekovtiń (2003 jyly týǵan) de dál osyndaı qurmetke bólenýine múmkindikteri boldy. Alaıda sheshýshi tusta olar ózge eldiń órenderine ese jiberip, kúmis medaldi qanaǵat tutty. Taǵy alty sportshymyz qola júldeni ıelendi.
Joǵaryda atalǵan nusqa boıynsha byltyr biz tuńǵysh ret Almatyda Azııa chempıonatyn uıymdastyrǵan edik. Sol kezde birneshe memleket jáne respýblıkamyzdyń ár aımaǵynan kelgen 500-deı sportshy kúsh synasyp, komandalyq esepte «Sarbazdyń» jigitteri bas júldeni jeńip aldy. Bishkekte ótken jarysqa da jan-jaqsy daıarlyqpen bardyq. Jarys jolyna shyqqan jerlesterimizdiń barlyǵy da jankeshtilik tanytyp, óz jankúıerlerin qýantý úshin esh aıanyp qalǵan joq. Nátıjesinde elge mol oljamen oraldyq, – deıdi Qurmet Núkenov.
Qazaqstandyq jekpe-jek sheberleri 12 júldeden bólek, basqa da atalymdar boıynsha túrli syılyqtarǵa ıe boldy. Al elimizdiń jasóspirimder quramasy komandalyq esepte top jaryp, arnaıy kýbokqa ıe boldy.
Ǵalym SÚLEIMEN,
«Egemen Qazaqstan»
