Qos el arasyndaǵy strategııalyq áriptestik baılanystardy nyǵaıtý jónindegi alǵashqy forým 2003 jyly Omby qalasynda ótip, sodan beri mundaı iskerlik kezdesýler shekaralas aımaqtarda júıeli túrde jalǵasyp keledi. Bul joly kún tártibine «Qazaqstan men Reseıdegi týrızmdi damytýdyń jańa tásilderi men úrdisteri» atty ózekti taqyryp shyǵaryldy. Al týrızmdi údemeli damytý úshin barlyq qajetti mádenı, tarıhı, geografııalyq, klımattyq jaǵdaılar bar. Forýmda onyń tartymdylyǵyn, tanymdylyǵyn arttyrý, básekege qabilettiligin nyǵaıtý arqyly jańa jumys oryndaryn qurý, shaǵyn jáne orta bıznestiń damýyna qolaıly jaǵdaı jasaý, ekonomıkanyń kiris bóligin kóbeıtý, saıahatshylar men demalýshylardyń eren qyzyǵýshylyǵyn týǵyzý sekildi ózekti máseleler jan-jaqty talqylanyp, kóptegen tyń ıdeıalar men ozyq jobalardyń qoldaý tapqanyn aıta ketken jón. Alǵashqy kúni ámbebap tennıs ortalyǵynda Qazaqstan – Reseı týrıstik kórmesi uıymdastyrylyp, saltanatty sharanyń ashylýyna Mádenıet jáne sport mınıstri Arystanbek Muhamedıuly, Reseıdiń týrızm jónindegi federaldyq agenttiginiń basshysy Oleg Safonov, oblys ákimi Qumar Aqsaqalov, ulttyq kompanııalardyń jetekshileri, isker toptar, mınıstrlikter men vedomstvolardyń jaýapty ókilderi, kásipkerler, týroperatorlar qatysty.
A.Muhamedıuly óz sózinde Qazaqstan men Reseı arasynda ózara senimge, dos-
tyqqa negizdelgen yqpaldastyq strategııasynyń nyǵaıa túskenin, úlgi etýge turarlyq tájirıbeler qalyptasqanyn, onyń ishinde týrızm keń aýqymdylyǵymen sıpattalatynyn, búginde eldiń básekelestik qabilettiligin aıqyndaıtyn sheshýshi faktorǵa aınalǵanyn atap ótti. Reseılik meıman eki el arasynda dostyqqa, túsinistikke qurylǵan qarym-qatynastyń strategııalyq mańyzyna toqtaldy. Búginde týrızm halyq sharýashylyǵynyń 53 salasyn damytýǵa yqpal etedi jáne sınenergetıkalyq áseri orasan. Reseıge jylyna 3,5 mıllıon qazaqstandyq saıahat jasaýǵa, demalýǵa kelse, 3 mıllıonǵa jýyq reseılik Qazaqstanǵa saıahattaıdy. Bul sıfrlar únemi ósip otyrýǵa tıis. Bizde týrızmdi damytýdyń múmkindikteri zor. Sondyqtan ishki týrızmdi zaman aǵymyna beıimdeý, jańa túrlerin kóbeıtý qashanda irgeli qadam bolyp qala beredi», dedi ol. Q.Aqsaqalov forýmǵa qatysýshylardy aıtýly oqıǵamen quttyqtap, senim artylǵan úlken mártebe ekenin tilge tıek etti. Forýmnyń taqyryby úlken ıntegrasııalyq múmkindikterge ıe. Ár óńirde týrısterdi tańǵaldyratyn oryndar bar. Bizdiń oblystaǵy erekshe aımaq – Imantaý-Shalqar kýrorty. Osyndaı kórikti jerlerge týrısterdiń kóptep kelýine kúsh salýymyz kerek. Bizde emdik qasıetke ıe kólder bar. Eki kún boıy týrıstik aǵynnyń artýy úshin aldaǵy josparlardy talqylaıtyn bolamyz», deı kelip, shekaralyq óńirlerdegi ıntegrasııalyq baılanystardy keńeıtýdiń ilkimdi tustaryna toqtaldy. Qyzyljar óńiri kórikti jerlerimen, qasıetti oryndarymen tanymal. Birlesken ister men naqty sheshimder qabyldaýdyń iskerlik alańyna aınalyp otyr. Erekshe suranysqa ıe kýrorttyq-demalys oryndarynyń servıstik qyzmetin, ınfraqurylymyn jaqsartýǵa jylda qomaqty qarajat jumsalady. Ekologııalyq, medısınalyq, emdik-saýyqtyrý túrleri qarqyn alyp keledi. Imantaý-Shalqar aımaǵy ornalasqan Aıyrtaý aýdany 40-qa jýyq týrıstik marshrýt usynyp otyr.
Forým sheńberinde «Týrızmdi damytýdaǵy kásipkerliktiń belsendi róli», «Týrızm salasyn sıfrlandyrýdaǵy qazirgi trendter», taǵy basqa taqyryptar boıynsha paneldik sessııalar uıymdastyrylyp, halyqaralyq kompanııa ókilderi, sarapshylar memlekettik-jekemenshik áriptestik áleýetin arttyrý, tarıhı-mádenı muralardy, ulttyq qundylyqtardy nasıhattaý, memlekettik qurylymdarmen baılanysty tereńdetý, qajetti ınfraqurylymdardy jasaý, ozyq baǵdarlamalardy qoldaý, halyqtyń turmysyn, ál-aýqatyn, ómir súrý sapasyn jaqsartýǵa yqpal etý máseleleri boıynsha oı-pikirler almasty.
О́mir ESQALI,
«Egemen Qazaqstan»
Soltústik Qazaqstan oblysy
