Bıylǵy shara aıasynda da álemdik kınematografııadaǵy tańdaýly týyndylar kórsetiledi. Otandyq kınoóndiris týyndylary úshin daıyndalǵan arnaıy baǵdarlama da júıelengen. Eń bastysy, bıyl túrkitildes memleketterdiń kınolaryna basa nazar aýdarylady.
Festıvaldiń ashylý saltanatyna QR mádenıet jáne sport mınıstri Arystanbek Muhamedıuly qatysty. Kınofestıvalge qoldaý bildirgen Almaty qalasy ákimdiginiń atynan sóz alǵan shahar basshysynyń orynbasary Arman Qyryqbaev: «Jańa festıvaldiń negizgi mıssııasy – Ortalyq Azııanyń júregi Qazaqstanda túrki áleminiń kınematografısterin biriktirý. Tarıhı turǵydan alǵanda bul tolyǵymen aqtalǵan qadam, sebebi túrkitildes halyqtardyń mádenı dıalogy yqylym zamannan beri jalǵasyp keledi. Endigi kezekte osy dıalogty jańa, sapaly deńgeıde damytý qajettiligi týyndap otyr. Osyndaı ustanymy bar XIV Halyqaralyq Sháken Aımanov kınofestıvali bizdiń qalamyzdyń mádenı ómirindegi jarqyn ári qyzyqty oqıǵa bolatynyna senimdimin», - dedi.
M.Áýezov atyndaǵy drama teatrynyń aldyna tóselgen qyzyl kilemmen álemdik jáne qazaqstandyq kınematografııanyń tanymal juldyzdary júrip ótti. Olardyń ishinde aýǵan rejısseri, «Altyn globýs» syılyǵynyń ıegeri Sıddık Barmak, «Miramax» kınokompanııasynyń vıse-prezıdenti, prodıýser Rozan Korenberg, Gollıvýdtiń sheteldik baspasóz qaýymdastyǵynyń (HFPA) shetel tilderindegi fılmder komıtetiniń tóraǵasy («Altyn globýs») Sergeı Rahlın, reseılik teatr jáne kıno aktrısasy Roza Haırýllına, túrik akteri Serdar Gekhan, álemdik kınojuldyz Kataıýn Begları, qazaqstandyq rejısser, ssenarıst Serik Apyrymov jáne taǵy basqalary boldy.
Qyrǵyz eliniń búgingi tańdaǵy eń tanymal kınorejısserleriniń biri Sadyq Sher-Nııaz: «Túrki dúnıesi degen ne nemese kim? Túrki dúnıesi degen – Omar Haıamnyń dúnıesi, Ábý ıbn Sınanyń dúnıesi, Ulyqbektiń dúnıesi, Nazym Hıkmettiń, Abaıdyń, Muhtar Áýezovtiń, Shyńǵys Aıtmatovtyń dúnıesi. Búgingi kúni osylardyń bári de shyǵarmashylyq nysandarǵa, nasıhatqa sýsap tur. Biz basqa mádenıetke bet buryp kettik»dep túrki elderiniń kınosyna basymdyq berip otyrǵan bıylǵy festıvaldiń jańalyǵyn qup alǵanyn qýana jetkizdi.
Kınofestıval 21 qarashaǵa deıin jalǵasady. Halyqaralyq deńgeıdegi sharanyń sheńberinde ár túrli shyǵarmashylyq kezdesýler, dóńgelek ústelder, konferensııalar men sheberlik dáristeri uıymdastyrylmaq.
Aıgúl AHANBAIQYZY,
«Egemen Qazaqstan»
ALMATY
