Baıandamanyń tanystyrylymynda fılosofııa ǵylymdarynyń doktory, professor, «Perspektıva» aqparattyq-keńes berý toby» QQ prezıdenti Elena Býrova, fılosofııa ǵylymdarynyń doktory, UQK Akademııasynyń professory Gúlnar Jumanova, áleýmettaný magıstri, PhD doktor Álııa Saılaýbekqyzy, t.b. mamandar keshendi zertteýler qorytyndysyn málim etti.
Bul derekter radıkalızmmen kúres júrgizetin quqyq qorǵaý organdary, dinı ekstremızmge qarsy máselelermen aınalysatyn úkimettik emes uıymdarǵa, jergilikti jerlerde dinı ınstıtýttarmen ózara yqpaldastyqta jumys isteıtin memlekettik qyzmetkerlerge baǵyttalyp otyr. Memlekettik tapsyrys aıasynda Almaty qalasy Din isteri boıynsha basqarmasynyń tapsyrysymen dinı qarym-qatynastar boıynsha qoldanystaǵy zańnamany túsindirýge baılanysty «Perspektıva» aqparattyq-keńes berý toby» QQ otyzdan astam sharalar ótkizgen.
Dinı úderister statıstıkamen naqtylanbaıdy, kózge kórine bermeıdi, olardyń áreketi de bir mezette paıda bolmaıdy, sondyqtan da qazaqstandyqtardyń dinı saýattylyǵy turǵysyndaǵy áleýmettik zertteýlerdiń mańyzy zor. Mundaı zertteýler barlyq aımaqtardy, turǵyndar sanyn esepke alý arqyly saraptamalyq saýalnama nátıjesinde júrgiziledi. Saraptama jáne kóptegen áleýmettik aqparattardyń jıyntyǵy negizinde qoǵamdyq pikirdiń, baǵamdaýdyń, qoǵamdaǵy dinı salanyń damýy men qazirgi jaǵdaıyna baılanysty ustanymdardyń qorytyndysyna oraı dinı úderisterdiń jalpy kórinisi anyqtalady.
Baıandamada qazaqstandyq qoǵamnyń ómirindegi dinniń róli, dindi qabyldaý máselesi, dástúrli jáne jańa dinderdiń mańyzy, dinı konversııalardyń trendteri, onyń ishinde, dinı ekstremızm jáne terrorızmge baılanysty kókeıkesti salalar keńinen kórinis tapqan.
Ekstremızmniń, radıkalızmniń aldyn alýǵa baǵyttalǵan otandyq jáne sheteldik tájirıbeler, sonymen qatar jetildirýdi qajet etetin zertteý ortalyqtary, dástúrli din ınstıtýttarynyń, qoǵamnyń, memlekettiń birlesken qadamdary zerttelgen.
Baıandama tyńdaýshylar tarapynan qyzyǵýshylyq týdyryp, suraq-jaýap, pikirlerge ulasty. Mádenı-rýhanı jańarýda, turaqtylyqta, yqpaldastyq aıasynda mańyzdy máselelerdi sheshýge qoǵamdyq kelisimder arqyly qol jetkizýdegi yntymaqtastyq týraly pikirler aıtyldy.
Elvıra SERIKQYZY,
«Egemen Qazaqstan»
ALMATY
