«Plıýralızmniń kómegimen órkendeý: ınnovasııalar men yntymaqtastyq arqyly alýan túrlilikti qoldaý» taqyrybyndaǵy forým jumysyna úkimet, zań shyǵarý organdarynyń basshylary, halyqaralyq, úkimettik emes jáne dinı uıymdardyń ókilderi qatysty. Qazaqstandyq delegasııa quramynda senator Murat Baqtııaruly jáne qoǵamdyq damý mınıstriniń orynbasary Berik Aryn boldy.
Sammıt barysynda tózimdilik máseleleriniń ártúrli kórinisteri jan-jaqty qaraldy. Sóz alǵandardyń basym bóligi sapaly bilim berý baǵdarlamalary, sondaı-aq otbasyndaǵy tárbıe arqyly jastardy tárbıeleý jáne olardyń boıynda tózimdilik qundylyqtaryn damytýdyń mańyzdylyǵyn atap ótti. Sarapshylar atalǵan salanyń qyzmeti baǵdarlamalyq jáne keshendi sıpatta bolyp, barlyq memleketterdiń úkimetteri úshin basym salanyń biri bolýy kerek degen ortaq pikirge keldi. Sonymen qatar, memlekettik jáne qoǵamdyq qurylymdar men buqaralyq aqparat quraldarynyń múmkindikteri men áleýetin paıdalaný qajettigi de aıtyldy.
Qatysýshylar ártúrli deńgeıde biregeı tájirıbelerdiń jınaqtalǵanyn jáne ony biriktirý ári úılestirý kerektigin de atap ótti. Tózimdilikti ilgeriletýge, sonyń ishinde dinaralyq jáne etnosaralyq daýlardyń, sondaı-aq ekstremızm men radıkalızmniń aldyn alýǵa baǵyttalǵan ulttyq jáne halyqaralyq sharalarǵa baǵdarlaný qajettigi de birneshe márte atalyp ótildi. Shara barysynda túrli qaýymdastyqtar arasyndaǵy mádenıetaralyq baılanystar men halyqaralyq qatynastardy damytý, adam quqyqtaryn qamtamasyz etý aıasynda dinı, násildik, etnostyq jáne basqa da belgiler boıynsha kemsitýge jol bermeý týraly aıtyldy.
Qabyldaýshy tarap ókilderi halyqaralyq qoǵamdastyqqa Birikken Arab Ámirlikterinde qurylǵan eńbek, bilim berý, dinı, penıtensıarlyq jáne basqa da túrli salalarda tózimdilikti qoldaý men kúsheıtý ınstıtýttary men tetikteri týraly jan-jaqty habardar etti. Sondaı-aq, tózimdilik pen qoǵamdyq kelisimdi qamtamasyz etýde qol jetken jetistikteri men tájirıbesin bólisýge ázir ekenin bildirdi. Ártúrli 200 etnos ókilderi turyp jatqan Arab Ámirlikteri el ekonomıkasynyń jáne halyqtyń ál-aýqatynyń damýyna yqpal etetin ózindik tózimdilik úlgisin qalyptastyrdy dep aıtýǵa bolady.
Dúnıejúzilik tózimdilik sammıti mazmundy ári joǵary uıymdastyrýshylyq deńgeıinde ótti. Kóptegen qatysýshylar, sonyń ishinde Qazaqstan delegasııasy da osy forýmdy álemdik deńgeıdegi turaqty únqatysý alańyna aınaldyrý týraly oılaryn bildirdi.
Sammıt aıasynda Parlament Senaty Tóraǵasynyń orynbasary Bektas Beknazarov BAÁ Ulttyq federaldyq Medjlisiniń tóraǵasy, doktor Amal ál-Kýbeısımen kezdesti. Taraptar ekijaqty qatynastardyń jaı-kúıin oń baǵalady jáne parlamentaralyq dıplomatııany odan ári damytýǵa senim bildirdi.
