Shara QazaqGeography jańa keńsesin tanystyrý rásiminen bastaldy. 1968 jyly salynǵan eski ǵımarat az ýaqyt ishinde qaıta jóndelip, qazir zamanaýı keńsege aınaldyrylǵan, onda murajaı, elektrondy kitaphana men medıa ortalyq jumys isteıdi.
Sezd jumysyna QazaqGeography Qamqorlyq jáne Basqarýshylyq keńesiniń músheleri, Qazaqstannyń barlyq óńirlerindegi ókilderi qatysty.
QazaqGeography tóraǵasy A. Mamın búgingi tańda Qazaqstanda tarıhı jáne mádenı muralardyń saqtalýyna beı-jaı qaramaıtyn ǵalymdardyń, mádenıet qaıratkerleriniń, túrli salalardyń kásibı mamandary men el jastarynyń basyn biriktirip otyrǵan uıymnyń mańyzdylyǵyn atap ótti. QazaqGeography qazaqstandyqtar úshin de, álemdik qaýym úshin de týrıstik nysandardy qoldaýda basty ról atqara alady jáne atqarýy tıis.
Onyń aıtýynsha, QazaqGeography Qazaqstannyń ǵylymyn, mádenıeti men tarıhyn nasıhattaý ortalyǵyna aınalýy tıis, bul Memleket basshysy N. Nazarbaev «Bolashaqqa baǵdar: rýhanı jańǵyrý» atty óziniń baǵdarlamalyq maqalasynda erekshe atap ótken elimizdiń mádenı kodynyń saqtalýyna úlesin qosady.
Esepti kezeńdegi qyzmet qorytyndylary týraly QazaqGeography basqarma tóraǵasy Jana Rústem baıandady. Onyń aıtýynsha, ótken bes jylda birlestik 60 jobany iske asyrǵan, 10 ekspedısııa jasaǵan, 13 kitap shyǵarǵan. 2015 jyldan bastap jyl saıyn búginde halyqaralyq sharaǵa aınalǵan «Han Qoryq» jastar festıvali ótkizilip keledi. Oǵan Qazaqstannyń jastary ǵana emes, jaqyn jáne alys shetelderden kelgen stýdentter de qatysady.
J. Rústemniń aıtýynsha, 2018 jyldan bastap «Kazakh Tourism» UK AQ yntymaqtastyq aıasynda QazaqGeography «Uly Dala Eline saıahat» jobasyna qatysty. Birlestik Ulytaýǵa, Shoqan Ýálıhanovtyń izimen Qashǵarııaǵa, Torǵaı geoglıfteri men Aral teńizine ekspedısııalar jasady. Jyl saıyn elimizdiń kıeli jerlerine «Kıeli Qazaqstan» ekspedısııalary ótkiziledi. Eskpedısııalardyń barlyq baǵyttary boıynsha GPS-koordınatalar belgilenedi.
Saryarqa jáne Jańa Jibek joly baǵyttar boıynsha jasalǵan ekspedısııalar nátıjesinde jańa týrıstik baǵyttar túzilip, ıllıýstrasııalanǵan jolnusqalar ázirlendi, tabıǵı jáne tarıhı-mádenı nysandar týraly sapaly foto- jáne beınebank jasaldy, olardyń jaı-kúıi týraly aqparattar jańartyldy.
Sez jumysyn aıaqtaı otyryp, QazaqGeography tóraǵasy A. Mamın tórt sanat: «Tabıǵat», «Adamdar», «Qalalar» jáne «Astana» taqyryptary boıynsha «Meniń Qazaqstanym» fotobaıqaýynyń jeńimpazdaryn marapattady.
Sonymen qatar QazaqGeography bes jyldyǵynyń qurmetine uıymnyń qalyptasýy men damýyna qosqan úlesteri úshin birlestiktiń belsendi múshelerine syı-qurmet kórsetildi.
