«Bólingen qarajat esebinen respýblıkalyq mańyzy bar 2,4 myń shaqyrym avtojol salynyp, qaıta jańǵyrtylsa, 7,5 myń shaqyrym jol jóndeldi. Barlyq nysanda 100 myńnan astam jumys orny ashyldy. Jol qurylysyna 95% otandyq óndirýshilerdiń materıaly paıdalanyldy», — deıdi J. Qasymbek.
Atap aıtqanda, Ortalyq — Ońtústik dálizi boıynsha Astana — Temirtaý ýchaskesi aıaqtaldy, kelesi jyly Temirtaý-Qaraǵandy jáne Qaraǵandy qalasyn aınalyp ótetin jol bóligi aıaqtalady. Bıyl Qaraǵandy — Balqash — Býrylbaıtal — Kúrti ýchaskelerinde jumys bastaldy. 2019 jyly Kúrti — Qapshaǵaı jolynda jumys bastalady.
Ortalyq — Shyǵys dálizi boıynsha Astana — Pavlodar ýchaskesinde Shiderti-Qalqaman ýchaskesin qospaǵanda, qozǵalys ashyq. 2 jolaq boıynsha júrýge bolady. Pavlodar — Semeı jáne Semeı — Qalbataý ýchaskelerinde Pavlodardan shyǵa beris joldan basqa ýchaskelerdiń bári aıaqtalǵan. Bul joba 2019 jyly bitpek.
Ortalyq — Batys dálizi boıynsha Qandyaǵash — Maqat ýchaskesinde jumys júrip jatyr. Bıyl Atyraý — Astrahan jáne Qandyaǵash — Aqtóbe ýchaskelerinde jumys bastaldy. Qalǵan ýchaskedegi jumystar kelesi jyly bastalady. Sondaı-aq, Qostanaı — Denısovka ýchaskesinde jumys júrip jatyr. Dáliz 2020 jyly tolyq aıaqtalady.
Jalpy, mınıstrliktiń aqparaty boıynsha, bastaý alǵan barlyq jobalar 2019-2020 jyldary tolyǵymen aıaqtalady.
«Osy jyldyń qorytyndysy boıynsha, 528 shaqyrym jol qozǵalysyn ashý josparlanyp otyr. Oral – Tasqala, Qordaı kentiniń aınalma joly, Beıneý – Aqtaý, Balpyqbı – Taldyqorǵan jáne Sarqandty aınalyp ótý jobalary boıynsha jumystar tolyǵymen aıaqtaldy», — dedi J. Qasymbek.
Aqyly avtojoldardy damytý boıynsha, bıylǵy qazan aıynan bastap Ishki ister mınıstrliginiń júıelerimen ıntegrasııalanǵan Almaty — Qapshaǵaı, Almaty — Qorǵas jáne Astana — Temirtaý ýchaskelerinde aqy alý júıeleri testtik paıdalanýǵa engizilgen. Kelesi jyldyń qańtar aıynyń ekinshi jartysynan aqy alýdy bastaý josparlanyp otyr.
Budan bólek, 5,9 myń shaqyrymdyq jolǵa aqy alý júıesin engizý boıynsha jobalyq-smetalyq qujattamany ázirleý jumystary júrgizilýde, onyń ishinde «Batys Eýropa — Batys Qytaı» halyqaralyq dálizi de bar. Tólemderdi jınaý júıesin montajdaýdy kelesi jyldan bastaý josparlanyp otyr. Jalpy, 2020-jylǵa qaraı uzaqtyǵy shamamen 6,6 myń shaqyrym jolǵa tólem alý júıesi qosylady.
Sonymen qatar, mınıstrlik bıylǵy jyldyń jeltoqsan aıynda Shymkent pen Saryaǵashtyń aınalmaly joldarynyń qurylysyn salýǵa jáne Saryaǵashtan О́zbekstan Respýblıkasynyń shekarasyna deıingi ýchaskeni qaıta jańǵyrtýǵa konsessııalyq negizde konkýrs jarııalamaq. Qurylys jumystary 2020 jyly bastalady.
«Memleket basshysynyń tapsyrmasyn oryndaý maqsatynda bıyl jergilikti jeli avtojoldaryn qarjylandyrý 156 mlrd teńgege deıin jetkizilip, 4 myń shaqyryman astam jol jóndeldi», — dedi J. Qasymbek.
3 jyldyq kezeńde jyl saıynǵy qarjylandyrý kólemi jylyna 5 myń shaqyrym jol jóndeýge múmkindik beretin 150 mlrd. teńgeden kem bolmaıdy. Bul sharalar qosymsha 10 myń jumys ornyn ashýǵa múmkindik beredi. Osy qarqyn kelesi jyly da saqtalady. Bul 2020 jylǵa deıin shamamen 30 myń shaqyrym joldy jóndeýge jáne jergilikti mańyzdaǵy jelilerdiń 85%-yn jaqsartýǵa yqpal etedi.
Sý kóligi salasynda Quryq portyn damytý is-sharalary júzege asyryldy. Qýattylyǵy 4 mln tonna bolatyn temir jol termınaly jáne bıyl qýaty 2 mln tonna bolatyn avtomobıl baılanysy iske qosyldy. Nátıjesinde, Aqtaý men Quryq porttarynyń ótkizý qabilettiligi 19,5 mln tonnadan 25,5 mln tonnaǵa deıin artty.
«Búgingi kúni Quryq portynyń jańa paromdyq termınaldary arqyly halyqaralyq Transkaspıılik baǵyty aıasynda 23 myńnan astam vagon men avtokólik nemese shamamen 3 mln tonna júk tasymaldandy. Búgingi kúni Qazaqstan Respýblıkasynyń Kaspıı teńizindegi júkterdi tasymaldaý úlesi shamamen 37%-dy quraıdy», — dedi mınıstr.
«Nurly jol» memlekettik baǵdarlamasy aıasyndaǵy ınfraqurylymdyq jobalardy iske asyrý nátıjesinde Qazaqstan arqyly jalpy tranzıttik konteınerlik tasymaldaý kólemi turaqty ósimdi kórsetip otyr. Memlekettik baǵdarlama aıasynda bıyl barlyq baǵyttar boıynsha jıyrma fýttyq ekvıvalentte 536 myń tranzıttik konteıner tasymaldaý josparlanǵan.
«Bıylǵy 10 aıda Qazaqstan arqyly ótken konteınerlik tasymaldar kólemi 411,5 myń jıyrma fýttyq ekvıvalent konteınerdi qurady, bul ótken jyldyń sáıkes kezeńmen salystyrǵanda 49%-ǵa artyq. Qytaı – Eýropa – Qytaı baǵyty boıynsha bul kórsetkish 10 aıda 235,5 myń jıyrma fýttyq konteınerdi qurady. Bul ótken jylǵy sáıkes kezeńmen salystyrǵanda 54%-ǵa artyq kórstekish. Jyl sońyna deıin jospar oryndalady dep kútilýde», — dedi J. Qasymbek.
Azamattyq avıasııa salasynda bıyl ósiminiń oń qarqyny saqtalýda. Qańtar–qazan aılarynda áýe kóligimen 6,7 mln jolaýshy tasymaldandy. Bul ótken jyldyń sáıkes kezeńimen salystyrǵanda 9,6%-ǵa kóp. 10 aıda elimizdiń áýejaılary 12,7 mln adamǵa qyzmet kórsetti, bul 2017 jylǵy sáıkes kezeńmen salystyrǵanda 6%-ǵa joǵary.
2017 jyly tranzıttik avıatasymaldar kólemi 175,2 mln ush.km qurady. 2018 jylǵy qańtar–qazan kezeńinde tranzıttik ushaq-shaqyrymy 2017 jylǵy sáıkes kezeńmen salystyrǵanda 4%-ǵa óskeni baıqalady.
Bıyl qańtar–qazan kezeńinde tranzıttik avıajolaýshylar sany 764 442 adamǵa jetti. Bul ótken jylǵy sáıkes kezeńmen salystyrǵanda 47%-ǵa artyq. QR IDM derekterine sáıkes, jyl qorytyndysy boıynsha bul san 1 mln adamnan asady.
Bıyl jyl basynan beri qazaqstandyq jáne sheteldik áýe tasymaldaýshylardyń qatysýymen 13 jańa baǵyt ashyldy. Olar: Helsınkıden Astanaǵa, Astanadan Vılnıýske, Qazanǵa, Sochıge, Chelıabınskke, Krasnodarǵa, Túmenge, Tomskige. Rıga men Krasnoıarsktan Almatyǵa, Atyraýdan Frankfýrtke, Máskeýden Qyzylordaǵa jáne Novosıbırskten Pavlodarǵa.
Qazirgi ýaqytta Semeı qalasy áýejaıynyń ushý-qoný jáne jermen júrý jolaǵyn, aerovokzalyn rekonstrýksııalaý jobasyn iske asyrý jumystary jalǵasýda. Jumysty bıyl jyl sońyna deıin aıaqtaý josparlanýda. Sonymen birge, bıyl Qostanaı qalasy áýejaıynyń ushý-qoný jolaǵyn qaıta jańǵyrtý bastaldy. 2019 jyly aıaqtalady.
Bıýdjet júktemesin tómendetý maqsatynda jylýmen, sýmen jabdyqtaý jáne sý tartý jelileri júıelerin jańǵyrtý salasynda bıýdjettik nesıeleý jáne sýbsıdııalaý mehanızmderi iske asyrylýda. 2015–2018 jyldary 404 jobany iske asyrýǵa 230,1 mlrd teńge bólindi, onyń ishinde 195,5 mlrd teńge ıgerildi. 3 478,6 shaqyrym jylýmen, sýmen jabdyqtaý jáne sý tartý jelilerin, 29 qazandyq pen 95 basqa da nysandar salý jáne qaıta jańǵyrtý josparlanýda. Memlekettik baǵdarlamany iske asyrý kezeńinde 2015 jyl men 2018 jyl aralyǵynda 2 982 shaqyrym jylýmen, sýmen jabdyqtaý jáne sý tartý jelileri men 24 qazandyq, 71 birlik basqa da nysandar salyndy jáne qaıta jańǵyrtyldy. 2018–2019 jyldary shamamen 290,6 shaqyrym jeli salý jáne qaıta jańǵyrtý josparlanyp otyr.
