Jıynda sot júıesin Qazaqstan halqyna arnalǵan bıylǵy Joldaýda kórsetilgen basymdyqtarǵa sáıkes odan ári jańǵyrtý máseleleri talqylandy.
– Halyqtyń sottarǵa senimi memleketke degen senimmen bara-bar. Osyǵan baılanysty, «100 naqty qadam» Ult jospary aıasynda mańyzdy jumys atqaryldy. Sot júıesin jetildirý ekonomıkamyzdy jańǵyrtýdyń jáne azamattardyń áleýmettik ál-aýqatyn arttyrýdyń mańyzdy bóligi sanalady, – dedi Elbasy.
Otyrysta Prezıdent Ákimshiliginiń Basshysy Á.Isekeshev, joǵarǵy sot tóraǵasy J.Asanov jáne joǵary sot keńesiniń tóraǵasy T.Donaqov Memleket basshysynyń tapsyrmasymen qurylǵan Sot júıesin jańǵyrtý jónindegi jumys tobynyń atqarǵan jumysynyń qorytyndylary jóninde baıandama jasady.
Nursultan Nazarbaev sot júıesiniń jumysyndaǵy keshendi máselelerdi sheshý úshin tıisti sharalar qabyldaýdy tapsyrdy. Osyǵan oraı, sot júktemesi sońǵy úsh jylda eki ese artqany atap ótildi.
– Bir jumys kúni ishinde sýdıa 4 otyrys ótkizip, osynshama sheshim qabyldap, 150 sanksııa shyǵarýy kerek. Osydan keıin, árıne, olardyń sapasyna qatysty suraq týyndaıdy. Bul isterdiń 30 paıyzy sotta qaraýdy qajet etpeıdi, – dedi Memleket basshysy.
Qazaqstan Prezıdenti elimizde sot júktemesin azaıtý, azamattyq prosesti jeńildetý, sot isin júrgizýdiń jyldamdyǵyn arttyryp, ashyqtyǵyn qamtamasyz etý jóninde sharalar qabyldaýdy tapsyrdy.
– Sot kadrlarynyń sapasy, olardyń múldem basqa ádisterdi talap etetin zamanaýı ekonomıkalyq jaǵdaılarǵa ázirligi jáne beıimdelýi – mańyzdy máselelerdiń biri. Quqyqtyq saýaty joq sýdıalar bizge reforma júrgizýge kómektese almaıdy. Sýdıalar quzyrettiliktiń, adaldyqtyń, ádilettilik pen ádeptiliktiń úlgisi bolýǵa tıis, – dedi Elbasy.
Nursultan Nazarbaev búginde sýdıalardy irikteý tártibi kúsheıtilgenin atap ótti. Máselen, sýdıa laýazymyna 100 úmitkerdiń ishinen 5-eýi ǵana synaqtan ótken. Bul shara sot jumysyna kúrdeli isterdi qarastyrýǵa qabiletti ári biliktiligi joǵary zańgerlerdi tartý úshin qabyldandy. Mundaı mamandarǵa tıisti jaǵdaı jasalyp, laıyqty jalaqy belgilenedi.
– Ant bergen sýdıalarǵa aıtarym, ant degenimiz, jaı ǵana sóz emes. О́z is-áreketterińizde antty basshylyqqa alýlaryńyz kerek. Sýdıalardyń jalaqysy men olardy qamtamasyz etý máselesi salyq tóleýshiler qarajaty esebinen sheshiledi. Sondyqtan sýdıalar tıimdi jumys isteýge tıis. Zań buzǵan sýdıaǵa eń qatal jaza qoldanylýy kerek, – dedi Memleket basshysy.
Qazaqstan Prezıdenti kadrlyq máselelerdiń bárin Joǵarǵy sottan Joǵary sot keńesine berýdi uıǵardy. Sýdıalardyń mansaptyq ilgerileýi qoǵam tarapynan baǵalanatyn kásibı biliktiligi men adaldyǵyna ǵana baılanysty bolýǵa tıis.
Elbasy sot kadrlaryn sapaly turǵyda jańartýǵa baǵyttalǵan zań jobasyn ázirlep, Parlamenttiń qaraýyna engizýdi tapsyrdy.
«Qazaqstan Respýblıkasynyń sot júıesi jáne sýdıalarynyń mártebesi týraly» Konstıtýsııalyq zańǵa sáıkes, 2019 jyly 470 sýdıa kásibı baǵalaýdan ótkiziledi. Osyǵan oraı, Nursultan Nazarbaev Joǵarǵy sot pen Joǵary sot keńesiniń basshylyǵyna bul máseleniń shynaıylyǵyn qamtamasyz etýdi tapsyrdy.
– Qoǵamda sottarǵa degen nyq senim bolǵanda ǵana sot júıesin jańǵyrta alamyz. Bizdiń túpki maqsatymyz – táýelsiz ári satylmaıtyn sot bıligi. Sottar statıstıkalyq ádistermen ǵana emes, sondaı-aq táýelsiz áleýmettik zertteýler júrgizý arqyly baǵalanatyn bolady. Sot quramy sýdıalardyń qanshalyqty adal qyzmet etip, senimge ıe bolǵanyna baılanysty baǵalanatynyn túsinýge tıis. Zańnamany qatań saqtaýǵa negizdelgen shuǵyl ári ashyq sot tóreligi qoǵamymyzdyń negizgi múddesi men elimizdiń strategııalyq damý baǵytyna saı keledi, – dedi Memleket basshysy.
Qazaqstan Prezıdenti sot isin júrgizýde jáne elektrondy servıster jumysynda jańa formattar engizýdi, sondaı-aq sot ǵımarattarynda front-keńseler qurýdy tapsyrdy.
Belgilengen mindetterdiń júzege asyrylýyna baqylaý jasaýdy qamtamasyz etý Prezıdent Ákimshiligine júkteldi. Bul oraıda, sot isteriniń sapaly ári ýaqtyly qaralýyna, sondaı-aq azamattardyń talabyn qanaǵattandyrýǵa basa mán berilýi kerek.
