Jıyndy ashqan Qazaqstan Prezıdenti quqyqtyq tártipti qamtamasyz etý jáne qylmysqa qarsy kúres júrgizý máselelerin qatań baqylaýda ustap otyrǵanyn aıtty.
Nursultan Nazarbaev ishki ister organdarynyń kúsh jumyldyrýynyń arqasynda sońǵy úsh jylda qylmys deńgeıi 17,5 paıyzǵa azaıǵanyn atap ótti.
– Adamdar qylmystyq áreketten qorǵaný úshin eń aldymen polısııaǵa barady. Táýelsizdik jyldary 779 polısııa qyzmetkeri qaza taýyp,
2,5 myńǵa jýyǵy jaraqat aldy. Muny esten shyǵarmaý kerek. Sonymen qatar ishki ister organdarynyń qazirgi jaǵdaıy qoǵam talabyna tolyq jaýap bere almaı otyr, – dedi Elbasy.
Memleket basshysy polıseılerdiń azamattarmen ózara qarym-qatynasynyń qazirgi standarttary eskirgenin ári zaman talabyna saı kelmeıtinin atap ótti.
– Ishki ister organdarynyń jumysy qoǵam kútken senimdi tolyq aqtaı almaı otyr, azamattardyń kóńil tolmastyǵyn týǵyzýda. Adamdar ózderin qaýipsiz sezine almaıdy. Biz onsyz basty baǵdarymyz sanalatyn qazaqstandyqtardyń joǵary sapaly ómir súrýin qamtamasyz ete almaımyz. Sondyqtan polısııany reformalaý isine shuǵyl kirisýimiz qajet, – dedi Qazaqstan Prezıdenti.
Nursultan Nazarbaev bıylǵy Joldaýdyń baǵyttaryna saı ishki ister salasynda mazmundy ári sapaly ózgerister jasaý qajettigine toqtaldy.
Otyrys barysynda kún tártibine sáıkes Prezıdent Ákimshiliginiń Basshysy Á.Isekeshev pen Ishki ister mınıstri Q.Qasymov baıandama jasady.
Elbasy berilgen málimetterdi nazarǵa alyp, josparlanǵan barlyq is-sharany muqııat pysyqtaý qajet ekenin aıtty.
Memleket basshysy jańǵyrtýdyń mańyzdylyǵyna toqtalyp, ishki ister organdarynyń qurylymy men shtatyn ońtaılandyrýdy, sondaı-aq ózine tán emes fýnksııalardy alyp tastaýdy tapsyrdy.
– Artyq nárseniń bárinen arylyp, qylmyspen kúres júrgizý jáne quqyqtyq tártipti saqtaý isine mán berý kerek. Qurylymdar ońtaılandyrylady. Sonyń nátıjesinde bir basshynyń qaramaǵynda úsheý emes, bes adam bolady.
Shtat sany 10 paıyzǵa qysqarady. Osy sharalar polıseıler sanynyń 100 myń adamǵa shaqqanda 471 polıseıden kelýin 424-ke deıin tómendetýge jol ashty. Bul eýropalyq ortasha deńgeıge sáıkes keledi. Osyǵan oraı, 16 mıllıard teńge únemdelmek, – dedi Qazaqstan Prezıdenti.
Nursultan Nazarbaev únemdelgen qarajatty qyzmetkerlerdiń eńbekaqysy men áleýmettik qamtý júıesin jaqsartýǵa jumsaýdy tapsyrdy. Elbasy qosymsha ishki rezervterdi izdeý jáne tıimsiz ákimshilik shyǵyndardy boldyrmaý jóninde júıeli jumys júrgizý qajettigin de aıtty.
– Polıseılerdiń jalaqysyn arttyrýǵa qosymsha 21,4 mıllıard teńge bólinetin bolady. Munyń bári – halyqtyń aqshasy. Polısııany, armııany jáne sottardy salyq tóleýshilerdiń qarajaty esebinen ustap otyrmyz. Sondyqtan azamattarymyz quqyq qorǵaý organdarynyń óz mindetin minsiz atqarýyn talap etedi, – dedi Memleket basshysy.
Qazaqstan Prezıdenti qylmysqa qarsy kúres júrgizetin jáne qoǵamdyq tártipti saqtaý isimen tikeleı aınalysatyn qyzmetkerlerdiń turǵyn úı máselelerin sheshý úshin qabyldanǵan sharalarǵa da toqtaldy. Bul sharalar polısııa jumysynyń eń mańyzdy degen baǵyttaryna bilikti jańa kadrlardy tartýǵa, sondaı-aq qoǵamdyq tártipti kúzetetin jáne qylmysqa qarsy kúres júrgizý qyzmetin atqaratyn bólimshelerdi kúsheıtýge múmkindik beredi.
Elbasy polısııa qyzmetkeriniń teris qylyq jasaǵany úshin ishki ister organdaryndaǵy qyzmetinen bosatylyp, barlyq jeńildikten aıyrylatynyn aıtty.
– Bizge jańa formasııanyń polıseıleri qajet. Kadrlardy irikteý, daıarlaý jáne ilgeriletý júıesi qaıta qarastyrylatyn bolady. Vedomstvolyq bilim berý isi aıtarlyqtaı ózgeredi. Mamandardy daıarlaý sapasy álemdik standarttarǵa saı keletin zamanaýı polısııa akademııalary qajet, – dedi Memleket basshysy.
Qazaqstan Prezıdenti Ishki ister mınıstrligine tıesili 12 oqý ornynyń úzdik beseýi ǵana qalatynyn aıtyp, oǵan joǵary jalaqy tólenetin meılinshe bilikti oqytýshylar iriktelip alynatynyn atap ótti.
– Qazirgi polıseılerdi kezekten tys attestasııa kútip tur. Zamanaýı standarttarǵa saı keletin qyzmetkerler ǵana qalady. Osy synaqtan ótpegenderdiń ornyna laıyqty qyzmetkerlerdi alý kerek. Qazaqstanda irikteýdi sapaly júrgizýge zor múmkindikter bar – jyl saıyn elimizdiń joǵary oqý oryndary 20 myńnan astam zańger daıyndap shyǵarýda, – dedi Elbasy.
Sondaı-aq Memleket basshysy ishki ister organdarynan jumystyń servıstik modeline kóshýdi talap etti.
– Jyl saıyn polısııaǵa 4,5 mıllıonnan astam azamat shaǵymdanady, al olardy qabyldaý úshin jaǵdaı jasalmaǵan. Eger basyna is túsken adam kelse, ony tezirek ári sypaıylyqpen qabyldaý kerek. Biraq bul – biter istiń jartysy ǵana. Onyń problemasyn shuǵyl ári zańǵa sáıkes qarastyrý qajet. Halyqpen jumys isteýdiń zamanaýı formaty degenimiz osy, – dedi Qazaqstan Prezıdenti.
Nursultan Nazarbaev jumys kestesi yńǵaıly, sondaı-aq jaıly, tehnıkalyq turǵydan jaqsy jaraqtandyrylǵan front-keńseler qurýdy tapsyrdy.
– Qyzmetkerlerdiń jumysynda dórekilik pen mensin-
beýshilik bolmaýǵa tıis. Bireý qylmystyń qurbany bolsa, nemese oǵan sondaı bir qaýip tónse, ol qaýipsizdikti sezinbeıinshe, jaıly ómir súrip, jumys isteı almaıdy, – dedi Elbasy.
Sonymen birge Qazaqstan Prezıdenti polısııa qyzmetin baǵalaýdyń jańa krıterıılerin engizýdi tapsyrdy.
– Krıterııler shynaıy ári tekseriletin bolýǵa tıis, sondaı-aq onda polısııa jumysynyń sapaly oryndalýy men osy jumystardyń tıimdiligine halyqtyń baǵa berýi kórinis tabýy kerek. Bul úshin memlekettik organdardyń statıstıkalyq málimetterimen qatar, áleýmettik zertteýlerdi de paıdalaný qajet. Azamattardyń senimi, jaıly turmysy men qaýipsizdigi polısııanyń tıimdiligin baǵalaýdyń negizine aınalady. Eseptik kórsetkishterdi arttyrý úshin jumys isteý ótkenniń enshisinde qalýǵa tıis, – dedi Qazaqstan Prezıdenti.
Sonymen qatar Memleket basshysy qoǵamdyq tártipti qamtamasyz etý jónindegi jumysqa sıfrly tehnologııany engizýdiń mańyzdylyǵyna nazar aýdardy.
– Ishki ister organdarynyń jumysyna sıfrly tehnolo-
gııany jappaı engizý qajet. Joldaýda kórsetilgendeı, Qazaqstannyń barlyq qalalary qoǵamdyq qaýipsizdikke monıtorıng júrgizý júıelerimen jabdyqtalady. Turǵyndarmen onlaın rejimdegi keri baılanysty jaqsartýǵa múmkindik beretin qyzmet túrleri engiziletin bolady. Zamanaýı tehnologııa polısııa qyzmetiniń barlyq salasyn qamtıdy, – dedi Nursultan Nazarbaev.
Qazaqstan Prezıdenti sıfrlandyrýdyń sybaılas jemqorlyqty azaıtýǵa, sondaı-aq basqarý býyndary men shtat sanyn odan ári ońtaılandyrýǵa septigin tıgizetinin atap ótti.
Memleket basshysy polısııa qyzmetin ǵana emes, sondaı-aq Ishki ister mınıstrliginiń basqa da qurylymdaryn reformalaý qajettigin aıtty.
– Qylmystyq-atqarý júıesine de mańyzdy ózgerister engiziletin bolady. Zorlyq-zombylyq jasaǵan qylmyskerler basqa sottalýshylardan bólek ustalady, – dedi Nursultan Nazarbaev.
Elbasy kóshelerdegi jáne basqa da qoǵamdyq oryndardaǵy qylmys deńgeıin meılinshe tómendetý jóninde sharalar qabyldaýdy tapsyrdy.
– Adamdar óz bolashaǵyna alańdamaýǵa, qaýipsizdigi memleket tarapynan qorǵalatynyna senimdi bolýǵa tıis. Azamattardyń jeke basy men múlikteriniń qaýipsizdigin qamtamasyz etýdiń mańyzy zor. Polısııa jumysy tıimdiliginiń negizgi krıterııiniń máni osynda, – dedi Memleket basshysy.
