Qyzmetkerleriniń jalaqysyn ósirýge ýáde berip otyrǵan batysqazaqstandyq kompanııalardyń 30-y – óndiris salasynda, 11-i – aýyl sharýashylyǵy sektorynda, al taǵy 10 fırma turǵyn úı-kommýnaldyq sharýashylyq jáne qurylys baǵytynda qyzmet etip júrgen ujymdar.
Eń aldymen «Aqsaıgazservıs» aksıonerlik qoǵamy kásiporyndaǵy jalaqysy tómen qyzmetkerleriniń eńbekaqysyn 20%-ǵa kóterý týraly sheshim qabyldady.
Qarashyǵanaq kenishinde, sondaı-aq Qashaǵan, Shynar (Chınarev) jáne Teńiz ken oryndarynda munaı men gazdy óndirý, óńdeý jáne tasymaldaý nysandaryn jaılastyryp, joǵary tehnologııalyq servıstik qyzmet kórsetetin «Aqsaıgazservıs» kompanııasynda 1800 adam qyzmet etedi. Bul – Batys Qazaqstan oblysyndaǵy eń iri jergilikti 100% qazaqstandyq kompanııa.
– Biz Elbasynyń bastamasyn tolyǵymen qoldaımyz. Kásiporynda salystyrmaly túrde tómen jalaqy alatyn 327 qyzmetkerimizdiń jalaqysyn bıylǵy qarasha aıynan bastap-aq kóterýge sheshim qabyldadyq. Bul úshin kásiporyn bıýdjetinen qosymsha aıyna 3,5 mln teńgeden astam qarajat bólindi. Sóıtip biz jylyna 41 mln teńgeden astam qarajatty jalaqy ósirýge jumsaǵaly otyrmyz, – deıdi kompanııa prezıdenti Tilek Shektibaev.
Kásiporynnyń sońǵy bir múshel tarıhynda qosymsha 1400 jumys orny ashylyp, jumysshylardyń ortasha jalaqysy úsh eseden asa ósken eken. Taǵy bir aıta keterligi, osy ýaqyt ishinde eńbekaqy tóleý bir kún de keshikpegen.
«Aqsaıgazservıs» AQ kásipodaq komıtetiniń múshesi, kótergish kran júrgizýshisi Irına Týkýsheva 2006 jyldan beri kásiporynnyń búkil ujymy munaı-gaz salasy qyzmetkerleriniń kásibı merekesi qarsańynda 50% jáne jyl sońynda «On úshinshi jalaqy» atalyp ketken 100% syıaqy alatynyn aıtady. Budan bólek, kompanııada eńbek ozattaryn yntalandyrý, 8 naýryz qarsańynda áıelderdi qurmetteý, eńbek demalysyna shyqqanda árkimniń eńbek ótiline qaraı materıaldyq kómek kórsetý – «Aqsaıgazservıs» AQ-nyń qalyptasqan daǵdysy.
Aıta bersek, «Aqsaıgazservıs» kompanııasynda qarapaıym jumysshynyń turmys sapasyn kóterýge arnalǵan qoldaý kóp-aq. Ujymdyq kelisimshartqa sáıkes kompanııanyń ár qyzmetkerine sábıli bolǵanda, 50 nemese 60 jasqa tolǵan kezde qosymsha syıaqy beriledi. Jyl saıyn Qazaqstan men Reseıdiń saýyqtyrý oryndaryna baryp, densaýlyǵyn túzeıtin qyzmetkerler úshin jeńildikti joldama, al olardyń ul-qyzyna sanatorıı men saýyqtyrý lagerlerine tegin joldama qarastyrylǵan.
Odan bólek, eńbek ujymyn salamatty ómir saltyna shaqyryp, ishki tatýlyqty arttyratyn otbasylyq saıystar, ulttyq kıim, ulttyq dastarqan máziri baıqaýlary, shańǵy jarysy, júzýden, voleıboldan, shaǵyn fýtbol men shahmattan, t.b. buqaralyq sport túrlerinen túrli saıys birinen soń biri ótip jatady. Mine, yntymaǵy jarasqan osyndaı ujym basshylary qarapaıym qazaqstandyqtardyń tabysy pen turmys sapasyn arttyrý jaıly Elbasy bastamasyna yqylastana ún qosty.
О́ńirdegi «Gıdroprıbor» AQ, «Stroıkombınat», «Oral mehanıka zaýyty», «Jaıykagro-LTD» JShS-leri, «Ýralskagroremmash», «Nurjanar» aksıonerlik qoǵamdary, «Steklo Servıs», «Kazarmaprom», «TMK-Kaztrýbprom», «Aıaz», «Kvant» jaýapkershiligi shekteýli seriktestikteri de óz qyzmetkerleriniń jalaqysyn ósirip, tabys pen turmys sapasyn arttyrýǵa den qoıǵan. Bul atalǵan kásiporyndarda 2019 jyldyń 1 qańtarynan bastap jalaqy kóterilip, eń tómengi jalaqy mólsheri 60 myń teńgeden joǵary bolmaq.
– Jańa jyldan bastap «Kvant» JShS-degi eń tómengi jalaqy mólsheri 61 myń teńge bolady. Biz memlekettik qoldaý arqasynda korpýsty jıhaz jasaıtyn jańa fabrıka ashyp otyrmyz. Sehtarymyz eń zamanaýı jabdyq sanalatyn germanııalyq «Homag», ıtalııalyq «Griggio» quraldarymen jaraqtanǵan, – deıdi kásiporyn basshysy Dmıtrıı Pshenıchnyı.
Oralda jún óńdep, pıma, kıiz sekildi túrli buıym shyǵaratyn «Aıaz» kompanııasy eń kóne óndiris oryndarynyń qatarynda. Qys jaqyndap, kún sýytqanda «Aıazdyń» ónimine suranys ta artady. Aıta keteıik, «Aıaz» kásiporny búginde metall «súıekti» kıiz úı, joryq lashyqtary, saýda qatarlary, munaı-gaz, agrosektor, tótenshelikter, t.b. sala qyzmetkerleri úshin arnaıy kıimder shyǵaryp, kópshilik kóńilinen shyǵyp júr.
– Biz halyqtyń ál-aýqatyn arttyrý týraly Elbasy bastamasyn tolyǵymen qoldaımyz. О́z tarapymyzdan kúni búgin 38 myń teńge jalaqy alyp júrgen 26 qyzmetkerimizdiń aılyq tabysyn 60 myń teńgege kóterýge sheshim qabyldadyq. Kórip otyrǵandaı, jalaqy eki esege jýyq kóterilmek, – deıdi kompanııa dırektory Amangeldi Ermekqalıev.
«Karavannyı pýt» qurylys kompanııasynyń dırektory Zamır Ihsanov Elbasy úndeýin alǵashqylardyń biri bolyp qoldap, qyzmetkerleriniń aılyq eńbekaqy mólsherin ósirip úlgergenin aıtady.
– Bizdiń kompanııa Memleket basshysynyń bastamasyn tolyq qoldaıdy. Biz árdaıym óz qyzmetkerlerimizdiń áleýmettik jaǵdaıyna kóńil bólip otyramyz. Joldaýdan keıin kompanııada qyzmet etetin búkil ujymnyń jalaqysyn 20 paıyzǵa, al tómen jalaqy alatyn qyzmetkerlerdiń aılyq tabysyn 35 paıyzǵa kóterdik. Qazir bizdiń kompanııada eń tómengi jalaqy mólsheri – 67 myń teńge, – deıdi Z.Ihsanov.
Elimizde arnaıy tehnıka shyǵaratyn iri kásiporynnyń biri – «Agroremmash» AQ basshylary da ıgilikti bastamaǵa ún qosýshylardyń biri. 60 jyldan beri búkil Qazaqstan óńiri men jaqyn shetelderdi arnaıy órt sóndirgish tehnıkamen, qalalyq abattandyrý mekemeleri úshin qajetti sý tasý-sýarý tehnıkalarymen qamtyp kele jatqan mekeme búginde avtosısternalar, tirkemeli kommýnaldyq tehnıkalar, eýrokonteıner jáne basqa da túrli metall qurylǵylaryn shyǵarýmen de tanymal.
– Eńbek etken adam sol eńbegine laıyqty jalaqy alýy tıis. Bul baǵytta Elbasy óte oryndy másele kóterip otyr. Jalaqyny ósirý, sol arqyly halyqtyń jaǵdaıy tómen tobyn áleýmettik qoldaý – durys másele. Bizdiń kompanııa da 2019 jyldyń 1 qańtarynan bastap eń tómengi jalaqy mólsherin 60 myń teńgeden asyrýǵa sheshim qabyldady, – deıdi kompanııa dırektory Armat Dúısenov.
2017 jyldyń sońynda oraldyq «Posh Rýno» fırmasynda teri óńdeıtin jańa zaýyt iske qosylǵan bolatyn. Onyń qýaty jylyna 182 myń iri qara terisi men 624 myń qoı-eshki terisin óńdeýge jetedi. Kásiporyn shyǵaratyn ónimniń bir jyldyq quny 2,2 mlrd teńgege jetpek. Qazirdiń ózinde zaýyt shyǵarǵan ónim otandyq naryqtan bólek, Túrkııa men Eýropa elderine eksporttalyp jatyr eken. Kásiporyn dırektory Erlan Ilııasov bul jetistikterge Elbasy júrgizip otyrǵan ekonomıkalyq saıasattyń nátıjesinde qol jetkizdik dep sanaıdy.
– Elbasynyń osy Joldaýy da memlekettik saıasattyń áleýmettiń ál-aýqatyn kóterýge baǵyttalǵanyn kórsetip otyr. Búkil álem boıynsha áleýmettik baǵdarlamalar azaıyp, kóptegen memleket óz halqy aldyndaǵy áleýmettik mindetterin oryndaı almaı otyrǵan daǵdarys sátinde Elbasynyń bul bastamasy – óte mańyzdy qadam dep esepteımiz. Biz de óz kezegimizde eń tómen jalaqy alatyn 50 qyzmetkerimizdiń jalaqysyn kóterýge sheshim qabyldadyq. Qańtar aıynan bastap olar aıyna 92 myń teńge alatyn bolady, – deıdi «Posh Rýno» JShS basshysy Erlan Ilııasov.
Kásiporyn basshylarynyń ıgilikti bastamalaryn qup alǵan Batys Qazaqstan oblysy ákiminiń orynbasary Baǵdat Azbaev óz kezeginde bul kompanııalardyń aldaǵy qyzmeti men básekege qabilettiligin arttyrý isinde jergilikti bılik tarapynan barynsha qoldaý kórsetiletinin málimdedi.
Qazbek QUTTYMURATULY,
«Egemen Qazaqstan»
Batys Qazaqstan oblysy
