Konferensııadan bir kún buryn Keńes Odaǵynyń Batyry, akademık, pedagog, jazýshy, qoǵam jáne memleket qaıratkeri Málik Ǵabdýllınniń Kókshetaýdaǵy mýzeıinde «Málik Ǵabdýllın – qazaqtyń Oqjetpesi» atty albom-kitaptyń tusaýkeseri ótkizildi.
Tusaýkeser rásiminde Aqmola oblysynyń ákimi Málik Myrzalın quttyqtaý sóz sóılep, «Málik Ǵabdýllın – qazaqtyń Oqjetpesi» atty albom-kitapty Batyr atyndaǵy mýzeıge tabys etti. Odan ári «Altyn kitap» baspa úıiniń dırektory Vıacheslav Tıtenov, qoǵam qaıratkeri, jazýshy-dramatýrg, «Aqmola-«Tirshilik» seriktestiginiń dırektory Jabal Erǵalıev jáne mýzeı dırektory Qudaıberli Myrzabek sóz sóılep, bul sharanyń Málik Ǵabdýllınniń esimin el esinde saqtaý baǵytynda jasalǵan ıgi qadam ekendigin aıtyp, jyly lebizderin bildirdi.
Osynaý aıtýly eńbekte batyrdyń ómiri men shyǵarmashylyǵy, qoǵamdyq qyzmeti jáne M.Ǵabdýllın mýzeıiniń ekspozısııalyq zaldary týraly tolyq maǵlumat berilgen. Albom-kitap Almaty qalasyndaǵy «Altyn kitap» baspasynan 1000 danamen jaryq kórdi.
Kelesi kúni konferensııaǵa qatysýshylar batyrdyń eskertkishine gúl shoqtaryn qoıyp, taǵzym etti. Konferensııa jumysyna Qazaqstan Respýblıkasynyń bedeldi qoǵam qaıratkerleri, ǵalymdar men elimizdiń aldyńǵy qatarly joǵary oqý oryndarynyń ǵylymı qyzmetkerleri men stýdentteri qatysty. Instıtýt basshysy, tehnıka ǵylymdarynyń doktory Syrym Sháriphanov konferensııany ashyp, júrgizip otyrdy. L.N.Gýmılev atyndaǵy Eýrazııa Ulttyq ýnıversıtetiniń ǵalymdary Qarjaýbaı Sartqoja men Jambyl Artyqbaev erlik úlgisimen, sol erlikti jasaǵan qaıtpas qaısar erler týraly tushymdy baıandamalar jasady.
Konferensııanyń ekinshi jartysynda seksııalyq otyrystar ótkizildi. Jumys qorytyndysy boıynsha sheshim qabyldanyp, qatysýshylarǵa sertıfıkattar tabys etildi. Bul bir erlikke úndeıtin, el halqyn jańa qazaqstandyq patrıotızmge baýlıtyn ónegesi mol shara boldy.
Baıqal BAIÁDIL,
«Egemen Qazaqstan»
Aqmola oblysy
