Tań bozynan bes-alty kisi saıatshylyq quryp, atqa qondyq. Áýelde kún ashyq bolatyn. Birte-birte aýa raıy ózgerip, biz taý bókterine jetken kezde aınala tóńirekti tuman basty. Sonda da bolsa qıqýlap, ań úrkitip kelemiz. Bir ýaqta tasa-tasadan shyǵyp, qasha jónelgen túlkilerdiń sońynan: «Qandy basyn beri tart!» dep, búrkitterdiń tomaǵasyn sypyrdyq.
Bıikten shúıligip túsken áýelgi qyran lezde qaıta serpilip, kókke kóterildi. Sebebi, aılaly túlki tik shapshyp, aıbar kórsetip tura qalǵan eken. Búrkitshiler mundaıda «Túlki kerdi!» deıdi. Kergen túlkige qyran birden túse almaıdy.
Bir qyzyǵy, alǵashqy ekpininen aınyp, keri serpilgen qyran óziniń jerdegi oljasyna qaıta shúıilgende taǵy bir kedergige tap bolyp, elektr baǵanalarynyń arasyndaǵy symǵa soǵylyp, jalt buryldy...
Mine, osy sátte álgi túlkige ekinshi búrkit tóne túsip, sheńgelin saldy. Al anaý, symǵa soǵylǵan qyran bolsa, óz baǵytynan aýytqyp baryp basqa túlkige tústi.
Iаpyr-aı, ańshylyq degendi qoısańyzshy bul!.. Túrli-túrli qyzyqtarǵa tap bolasyń ǵoı.
О́z qyranynyń symǵa soǵylyp, basqa túlkige túskenin ańdamaı qalǵan búrkitshi keıingi shúılikken qyrandy ajyratyp alyp jatyp:
– Oı, oı, mynaý meniń búrkitim emes qoı! – dep sasqalaqtap, basyn shaıqaı berdi.
Biz kúlip:
– Apyr-aı, á?! – dep óp-ótirik tańǵalǵan bolamyz.
Mine, jigitter, ańǵa shyqqanda osyndaı-osyndaı qyzyqtardy bastan keship, ázildesip, kúlip júremiz.
Shirkin, qansonarda atqa qonyp, qus salyp, ańshylyq quryp qaıtý degenińiz, er azamattyń kóńilin sergitip, dostyǵyn nyǵaıtyp, jan dúnıesine sáýle túsiretin bir ǵanıbet qoı.
Nurǵalı ORAZ,
«Egemen Qazaqstan»
