Bul jetistikter Túrkistan qalasynda alǵash ret ótken «AGROFEST-2018» aýyl sharýashylyǵy festıvalinde aıtyldy. Aýyl sharýashylyǵy salasynyń ardagerleri, eńbek ozattary, kásipkerler, halyq qalaýlylary men sala mamandary qatysqan merekelik jıynda oblys ákimi Janseıit Túımebaev 500 myń tonnaǵa jýyq ónimder Reseı, Belarýs, Latvııa, Germanııa memleketterine, 1 mln. tonnasy elimizdiń soltústik óńirlerine jóneltilgenin atap ótti. «Qarqyndy baýlardyń kólemi 2800 gektarǵa jetip, eldegi jemis-jıdektiń 40 paıyzy, júzimniń 73 paıyzy Túrkistan oblysynda óndirildi.
Respýblıkadaǵy salynǵan jylyjaılardyń 77 paıyzy, tamshylatyp sýǵarý ádisiniń 73 paıyzy da bizdiń óńirge tıesili. Oblysta alǵash ret 6,2 myń tonna et eksporttalyp, respýblıka eksportynyń 41 paıyzyn qamtydy. Munyń barlyǵy Sizderdiń etken eńbek, tókken termen kelgen jetistikter dep aıtýǵa tolyq negiz bar», – dedi Janseıit Qanseıituly.
Festıval barysynda kórme uıymdastyrylyp, onda aýyl sharýashylyǵy ónimderi, asyl tuqymdy tórt túlik maldyń túrleri men ozyq tehnıkalar usynyldy. Al aýyl sharýashylyǵy ónimderiniń jármeńkesinde 182 tonna tabıǵı taza ónimder naryqtaǵy baǵadan 15-20 paıyzǵa arzan baǵada saýdalandy. Qonaqtar úshin 1 tonna palaý men 1 tonna baýyrsaq daıyndalyp, kópshilikke tegin taratyldy. Sondaı-aq aýyl sharýashylyǵy salasynda belsendilik tanytyp, úzdik kórsetkishke qol jetkizgen aýdan, qalalar jáne jeke sharýalar «Ozat astyq jınaýshy», «Ozat mal bordaqylaýshy», «Ozat baqsha ósirýshi» syndy 21 nomınasııa boıynsha marapattaldy. Odan bólek, aýdan - qalalar arasynda 16 baǵyt boıynsha úzdikter anyqtaldy.
Ǵalymjan ELShIBAI,
«Egemen Qazaqstan»
Túrkistan oblysy
