Erteń jartylaı fınaldyq saıystar bastalady. Bul mejege Qazaqstannyń qos boksshysy jetip otyr. Olar – Jaına Shekerbekova men Karına Ibragımova. 51 kılo salmaqta óner kórsetetin Jaına shırek fınalda polshalyq Sandra Drabıkti utqan bolatyn. 60 kılo salmaqtaǵy Karına qytaılyq Iаng Venlýdy qapy qaldyrdy. Osylaısha, elimizdiń qos arýy júldeli oryndardyń birin ıelený múmkindigine ıe bolyp otyr.
Jartylaı fınalǵa eń kóp joldama alǵan Qytaı quramasy. Aspanasty eliniń bes birdeı ókili osy mejege súrinbeı jetti. Úndistan quramasynyń da qarqyny kúshti. Jergilikti bylǵary qolǵap sheberleriniń tórteýi jeńis tuǵyryna kóterilip otyr. Soltústik Koreıa, AQSh jáne Túrkııanyń úsh boksshysy da dál sondaı qurmetke bólenýde. Qazaqstan, Japonııa, Ýkraına, Taıpeı, Gollandııa jáne Germanııadan eki sportshy júldeli oryn úshin talasý quqyǵyn saqtap qaldy. Sondaı-aq, Mońǵolııa, Bolgarııa, Avstralııa, Taıland, Ońtústik Koreıa, Irlandııa, Ýels, Belarýs, Kolýmbııa jáne Reseıden bir-bir boksshy jarysty jalǵastyrmaq.
Jartylaı fınaldyq saıystar 22-23 qarasha aralyǵynda ótse, 24 qarashada aqtyq synǵa joldama alǵan arýlar bas júlde úshin talasady.
Ǵalym SÚLEIMEN,
«Egemen Qazaqstan»
