Uıymdastyrýshylardyń aıtýynsha, kıeli jerlerdi jaqynnan tanyp, jiti zertteý arqyly sheteldegi otandastarymyz atajurtynyń ótkenine úńilip, elimizdiń mádenıetine, ónerine jáne halyqtyq dástúrlerine jaqyndaı túsedi. Atalmysh qor uıytqy bolǵan, Túrkistan qalasynda bastalǵan, «Týǵan jerge taǵzym» keń aýqymdy jobanyń mindeti - alys-jaqyn shetelderde, Avstrııa, Anglııa, Fransııa, Shvesııa, Iran, Qytaı, Monǵolııa, Tájikstan, Reseı, Belorýs, О́zbekstan jáne Qyrǵyzstanda turatyn qandastarǵa arnap, Qazaqstannyń kıeli jerlerine tarıhı-tanymdyq ekskýrsııalar serııasyn uıymdastyrý. Bul oraıda Qoja Ahmet Iаsaýı, Arystan Bab keseneleri, Túrkistannyń tarıhı murajaıy jáne óńirdiń basqa da kórikti jerlerin tanystyrý arqyly qazaq halqynyń mádenı jáne rýhanı qundylyqtaryn nasıhattaý kózdelip otyr.
Atajurtyna kelgen qandastardy qarsy alǵan oblys ákimi Janseıit Túımebaev osynaý mańyzdy kezdesý Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń aıasynda uıymdastyrylyp jatqanyn aıtyp, júzege asyrylyp aýqymdy jumystardan habardar etti. Al Q.A.Iаssaýı atyndaǵy Halyqaralyq qazaq-túrik ýnıversıtetinde «Qazaqstannyń kıeli jerleri» taqyrybynda ótken «dóńgelek ústelde» oblys ákimi «Qasıetti Qazaqstan» respýblıkalyq ortalyǵyna 104 nysan usynylyp, onyń ishinen 26 nysan respýblıkalyq tizimge engizilgenin atap ótti. «Qazaqstannyń kıeli jerleri» jobasy aıasynda atqarylyp jatqan isterge toqtaldy. Sondaı-aq, júzdesýde «Otandastar qory» KEAQ prezıdenti Nurtaı Ábiqaev, «Dúnıejúzi qazaqtarynyń qaýymdastyǵy» RQB Tóraǵasynyń birinshi orynbasary Zaýytbek Turysbekov, Q.A.Iаsaýı atyndaǵy HQTÝ rektory Bolatbek Abdrasılov, Ulttyq mýzeıdiń «Qasıetti Qazaqstan» ortalyǵy basshysynyń orynbasary Batyrhan Jumabaev, Memlekettik tildi damytý qorynyń dırektory Azat Shaýeev jáne shet eldik dıaspora ókilderi sóz sóılep, ótkizilip jatqan sharanyń mańyzdylyǵyn, eldi tanýǵa, barymyzdy baǵalaýǵa, qundylyqtardy qadirleýge zor yqpaly tıetinin atap ótti.
Aıta ketelik, «Otandastar qory» «Týǵan jerge taǵzym» tarıhı-tanymdyq ekskýrsııalar jobasyn «Rýhanı jańǵyrý» memlekettik baǵdarlamasy aıasynda ótkizip otyr.
Ǵalymjan ELShIBAI,
«Egemen Qazaqstan»
Túrkistan oblysy
