Bıyl óńirde 3,4 mıllıon gektar alqaptyń ár gektarynan 13 sentnerden dán jınalyp, 5,6 mıllıon tonnadan astam altyn astyq qambaǵa quıyldy. Jınalǵan astyqtyń kólemi jaǵynan oblys respýblıka boıynsha aldyńǵy orynǵa shyqty. Kartop pen kókónistiń de mol qory jınaqtaldy.
Mundaı tabysqa eginshilik mádenıetin jaqsartý jáne traktor-kombaın parkin qaıta jaraqtandyrý nátıjesinde qol jetkizildi. Oblysta bıyl 225 traktor, 229 astyq kombaıny, 63 egin sebý kesheni satyp alyndy. Bulardyń bári sheteldik ónimdiligi joǵary tehnıkalar. Tıimdiligi kóktemgi egis pen egin oraǵynda aıqyn ańǵaryldy.
Oblysta oń ózgerister bar. Bıyl 15,1 mıllıard teńgeniń 13 ınvestısııalyq jobasynyń iske asyrylyp jatyr. О́ńir óziniń eksporttyq áleýetin de eselep, qambaǵa quıylǵan 6 mıllıon tonnaǵa jýyq astyqtyń 2 mıllıon tonnasyn eksportqa shyǵarý múmkindigine ıe bolyp otyr. О́ńdeýshi kásiporyndar da tolyq qýatynda jumys isteýde. Elevatorlarǵa astyqtyń quıylyp alynýy 88 prosentti qurasa, et óńdeý qýaty 55, sút óńdeý qýaty 80 prosentke jetkizildi.
Mal sharýashylyǵynda da ilgerileý ańǵarylady. Tórt túlik mal basynda ósim bar. Búgingi tańda on myń basqa deıin iri qara mal semirtilýde.
Memleket aýyl sharýashylyǵyna sýbsıdııa mólsherin kóbeıtýde. Máselen, bıyl aýyl sharýashylyǵy eńbekkerleri Úkimetten 25 mıllıard teńgeniń tegin sýbsıdııasyn aldy. Kómektiń de qaıtarymy bolýy kerek. Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda alǵa qoıyp otyrǵan sıfrlandyrý máselesine de kóp kóńil bólinýi qajet. Bir qýanyshtysy, oblys «Sıfrlyq Qazaqstan» pılottyq jobasyna kirip, salada sıfrlandyrý jumystary keń qanat jaıǵaly otyr. Qazirdiń ózinde kóptegen egistik alqaptary, sonymen birge, mal sharýashylyǵynda úsh taýarly-sút fermasy tolyq sıfrlandyrylyp úlgerildi. Elbasy joǵarydaǵy Joldaýynda elimiz boıynsha aýyl sharýashylyǵy salasynda eńbek ónimdiligin 2,5 ese arttyrý mindetin qoıyp otyr. Bul mindetti oblystyq aýyl sharýashylyǵy qyzmetkerleri jaqsy túsinýde.
Saladaǵy bir erekshelik, bıylǵy jyly aýdandary klımattyq jaǵdaılaryna jáne topyraq qunarlylyǵyna baılanysty úsh aımaqqa bólinip, sonyń árqaısysynda jarys jeńimpazdary qarastyrylǵan eken. Osy úsh toptyń árbireýinde astyq óndirisi boıynsha Jaqsy, Sandyqtaý jáne Selınograd aýdandary jarys kóshin bastap tur.
Astyqtyń shyǵymdylyǵy boıynsha joǵary kórsetkishke qol jetkizgen Esil aýdanyndaǵy «Zarechnyı» seriktestigi, Sandyqtaý aýdanyndaǵy «Aıdos» sharýa qojalyǵy. Astyq qabyldaıtyn kásiporyndar ozyq tehnologııalardy paıdalanýda. Úzdik astyq qabyldaý kásiporny Jarqaıyń aýdanyndaǵy «Aqbıdaı» seriktestigi. Bir quptarlyǵy, jıynda qarapaıym adamdardyń eńbegi egjeı-tegjeıli atalyp ótildi. Qorǵaljyn aýdanyndaǵy «Sara Grain» Agrofırmasy» seriktestiginiń kombaınshysy Serik Ybyraev, Býrabaı aýdanyndaǵy «Býrabaı 2007 AF» seriktestiginiń mehanızatory Aleksandr Vlasov, Jaqsy aýdanyndaǵy «Aıbat» seriktestiginiń júrgizýshisi Maqsut Nurjanov, Bulandy aýdanyndaǵy «Jýravlevka-1» seriktestiginiń bas ınjeneri Grıgorıı Chernenkov, Shortandy aýdanyndaǵy «Jáken-1» seriktestiginiń bas agronomy Volfgan Zagert óz mamandyǵynyń úzdigi atandy.
Oblysta mal bordaqylaıtyn mamandandyrylǵan kásiporyndar júıesi jap-jaqsy jumys istep tur. Osy salada joǵary kórsetkishterge qol jetkizgen Zerendi aýdany oblys ákiminiń Alǵys hatymen marapattaldy. Sondaı-aq, Egindikól aýdanyndaǵy «Rost Agro LTD» seriktestiginiń malshysy Serik Ábildınge, Ereımentaý aýdandyq veterınarııa bóliminiń mal dárigeri Tólegen Serenovqa, Astrahan aýdanyndaǵy «Kolýton-04 AShK» seriktestiginiń bas zootehnıgi Seıilhan Qasenovke, Arshaly aýdanyndaǵy «Poıs agro fırmasy» seriktestiginiń buzaý kútýshisi Marına Petrıge qurmet kórsetildi.
Oblysta Astananyń azyq-túlik beldeýin qamtamasyz etýge nazar aýdarylýda. Mol ónimniń birazy shetelderge shyǵarylýda. Sút óndirýde Selınograd aýdanyndaǵy «Rodına» Agrofırmasy», Zerendi aýdanyndaǵy «Milk Project» seriktestikteri kósh bastap keledi.
Aqyq dán aıalap, aqtyly mal ósirgen aýyl eńbekkerleriniń qanshalyqty qareket etip jatqandyǵyn jalpaq jurtqa áıgilegen jıyn barysynda búginginiń eńbek bahadúrleri ǵana emes, burynǵy baıraqty básekede aldyna jan salmaǵan jampozdar – eńbek erleri de qurmetke ıe boldy. Respýblıka astyǵynyń shıregin ósirip otyrǵan ólkeniń júırikteri, dańǵaıyr dıqandar daralanǵan kún boldy bul.
Baıqal BAIÁDIL,
«Egemen Qazaqstan»
Aqmola oblysy
