Aqparat jáne kommýnıkasııalar mınıstrliginiń habarlaýynsha, kabeldik kárizjeli qyzmetteriniń tarıfi sońǵy eki jylda esh ózgermegen ári ol qyzmet tek zańdy tulǵalarǵa kórsetiledi.
D. Sheglovanyń aıtýynsha, aýyl turǵyndaryna telefon jáne ınternet tarıfteri boıynsha (2013 jyldan bastap) óz qunynan tómen baǵamen qyzmet kórsetiledi. Telefon baılanysy tarıfi — 596 teńge (al ózindik quny — 1125 teńge), ınternet tarıfi — tarıftik josparǵa qaraı 982 teńge men 1964 teńge aralyǵynda (ózindik quny — 2932 teńge).
Aýyldyq jerlerde tarıf boıynsha ámbebap qyzmet kórsetetin operatorlarǵa ótemaqy bıýdjet esebinen tólenedi. Bıylǵy jyly osy qyzmetterdi sýbsıdııalaýǵa 8,7 mlrd teńge qarjy bólingen.
«Dúnıejúzilik ekonomıkalyq forýmnyń Jahandyq básekelestikke qabilettilik ındeksinde baılanys qyzmetteriniń tarıftik qoljetimdiligi boıynsha Qazaqstan joǵarǵy orynda tur. Onyń ishinde uıaly baılanys tarıfteri boıynsha Qazaqstan 140 eldiń ishinde 29 orynda bolsa, al bekitilgen keńjolaqty ınternet qyzmetteri boıynsha 20 orynda», — deıdi D. Sheglova.
Baılanys qyzmetterine baǵany tómendetý boıynsha tapsyrmany oryndaý maqsatynda QR AKM barlyq iri baılanys operatorlarynyń: «Qazaqtelekom» AQ, «Transtelekom» AQ, «Qaztranskom» AQ, «Ksell» AQ, «Kar-Tel» JShS, «Mobaıl Telekom-Servıs» JShS qatysýymen keńes ótkizdi.
«Keńes qorytyndysy boıynsha baılanys operatorlary qoljetimdi «áleýmettik» tarıftik josparlardy ázirleý arqyly baılanys boıynsha kórsetiletin qyzmetter tarıfin tómendetýdi usyndy. Aqparat jáne kommýnıkasııalar mınıstrligine osy aıdyń sońyna deıin jańa trıftik josparlardyń qurylymy, qyzmet kórsetý kólemi men baǵalary boıynsha usynystar engizý tapsyryldy. Operatorlardan áleýmettik tarıftik josparlar boıynsha aqparat alǵan soń olardy BAQ-tarda nasıhattaý jumystary júrgiziletin bolady», - dep túıindedi vıse-mınıstr.
