Salamatty urpaq kóbeıtip, halyq sanyn arttyrý búginniń basty taqyryby bolyp otyr. Bul týraly Elbasy óz Joldaýynda da aıtyp ótken bolatyn. Sol tapsyrma negizinde sońǵy jyldary kóptegen perzenthana salynyp, áıelder men balalar konsýltasııalary sııaqty túrli joba uıymdastyrylyp jatyr. Taıaýda Astana qalasynyń Qoǵamdyq densaýlyq saqtaý basqarmasy jáne №3 perınataldy ortalyǵy ana men bala ómirin jaqsartýǵa arnalǵan sheberlik sabaǵyn ótkizdi. Sheberlik sabaǵy áıelderdiń júktilik kezindegi ishki psıhologııalyq jaı-kúıin retteý men balaǵa durys kútim jasaý taqyrybyna arnaldy. Shara barysynda №3 perınataldy ortalyqtyń dárigerleri qatysýshylarǵa bosaný kezinde durys tynys alýdy, art-terapııany qoldaný arqyly bala týý prosesin jeńildetýdi úıretti. Sondaı-aq bolashaq analar úshin arnaıy massaj ben bı túrleri kórsetildi.
Dárigerlerdiń aıtýynsha, ana men bala óliminiń kóbeıýi áıelderdiń júktilik kezindegi durys kútimniń bolmaýynan oryn alady. Dáriger ýaqtyly tekserýden ótip turýdy qansha mindettese de, júkti áıelderdiń birazy buǵan kóńil bóle bermeıdi. Júkti áıelderge qatysty túrli oqıǵalardyń negizgi sebebi de osy. Bıyl Astana qalasy boıynsha 6 júkti áıeldiń ólimi tirkeldi. Bul oqıǵaǵa baılanysty Densaýlyq saqtaý mınıstrligi shuǵyl sharalardy qolǵa alyp, ana men bala máselesine aıryqsha nazar aýdaryp otyr.
№3 perınataldy ortalyqtyń bas dárigeri Z.Hamıdýllınanyń aıtýynsha, ana men bala densaýlyǵyn jaqsartýda bilikti mamandar tartylyp, jańa múmkindikter qolǵa alynýda. Burynǵy kezderi bosaný barysy jabyq túrde ótken bolsa, qazirgi kúni seriktestik bosaný ádisi bar. Dárigerler áıelderge medısınalyq kómekpen qosa, olardyń psıhologııalyq, emosıonaldyq jaǵdaıyn retteýge kómektesedi. Olardyń aıtýynsha, ananyń jaqsy kóńil kúıi ishtegi sábıdiń tolyq jetilýine úlken úles qosady.
Elimizdiń strategııalyq qujattarynda kórsetilgendeı, 2020 jylǵa qaraı ana men bala ólimi kórsetkishin 2 esege azaıtyp, qazaqstandyqtardyń ortasha ómir súrý uzaqtyǵyn 72 jasqa deıin arttyrý kózdelgen. Qazir Qazaqstanda ár 85 sekýnd saıyn 1 náreste dúnıege keledi. Al jyl basynan beri 341 750 sábı dúnıege kelgen. Sońǵy 10 jylda bala týý kórsetkishi 25%-ǵa artyp, salmaǵy 1500 gramǵa deıin bolatyn balalardy aman saqtap qalý kórsetkishi jaqsarǵan.
Marjan TILEÝBEK,
«Egemen Qazaqstan»
