Konferensııa jumysyn ashyp, júrgizgen Qaraǵandy oblysynyń ákimi Erlan Qoshanov bıyl Buqar jyraý Qalqamanulynyń 350 jyldyǵy aıasynda ótkizilgen sharalar týraly aıtyp berdi.
Konferensııaǵa qatysýshy ǵalymdar «Kómekeı áýlıeniń» ómir tarıhyna, sońyna qaldyrǵan murasyna arnalǵan taqyryptarda mazmundy baıandamalar jasady. Úndistannan kelgen ǵalym Pýnıt Gaýra «Rýhanı jańǵyrý» baǵdarlamasy jáne Buqar jyraý shyǵarmashylyǵy týraly tezıster arqyly tushymdy áńgime qozǵady.
– Barlyǵymyzǵa belgili, Nursultan Nazarbaev «Uly dalanyń jeti qyry» atty maqalasyn jarııalady jáne eldiń bolashaǵyna, qoǵamdyq sananyń jańǵyrýyna óz kózqarasyn bildirdi. Ǵulama qazaq aqyny jáne memlekettik qaıratkeri Buqar jyraýdyń mereıtoıy aıasynda onyń qoǵam men ultty damytýǵa qosqan úlesi jaıly bilgen mańyzdy. Prezıdent Qazaqstanda jańǵyrtý jáne jańa ıdeıalardyń kómegimen jarqyn bolashaq qurýǵa erekshe tarıhı múmkindik bar ekenin atap ótti. Men qazaqstandyqtardyń, onyń ishinde jas urpaqtyń bul jańǵyrtýdyń mańyzdylyǵyn túsinetinine senimdimin. Osy negizde túrli aımaqtar men oblystardan jınalǵan «Qazaqstannyń 100 tarıhı tulǵasy» jobasy da qurylýy jáne Buqar jyraýdyń murasy atalmysh jobany qurý kezinde mańyzdy materıal bolýy ábden múmkin, – dep atap ótti Pýnıt Gaýra.
Buqar jyraýdyń urpaǵy Qabdulsamıh Aıtqojın «Kómekeı áýlıe» shyǵarmashylyǵy qazaq halqynyń ensıklopedııasy ispetti degen pikir aıtty.
– Ol urpaqtar arasyndaǵy baılanys rólin atqarady. Bul turǵyda Buqar jyraý murasy «Rýhanı jańǵyrý» baǵdarlamasyn júzege asyrý isimen jáne Prezıdentimizdiń ulttyq tarıhymyzdyń jeti qyry týraly maqalasynyń mazmunymen jarasymdy úılesim taýyp otyr, – dep atap ótti Buqar jyraýdyń jetinshi urpaǵy, jıenshary bolyp keletin Qabdulsamıh Aıtqojın.
Konferensııa jumysyn qorytyndylaı kele, Qaraǵandy oblysynyń ákimi Erlan Qoshanov birqatar usynystar aıtty.
– Birinshiden, biz Buqar jyraýmen baılanysty tarıhı sátter men onyń ómiri týraly ǵana aıtýmen shektelmeýimiz qajet. Onyń tulǵasyna jańa kózben, jańa ıdeıalarmen qaraıtyn ýaqyt jetti. Elbasynyń «Uly dalanyń jeti qyry» maqalasynda bizdiń ǵulama qaıratkerlerimizdiń ómiri týraly barlyq derekterdi jınaý qajettiligi týraly aıtylǵan. Osyǵan oraı Prezıdent «Arhıv-2025» jeti jyldyq baǵdarlamasyn qurýdy tapsyrdy. Múmkin Buqar jyraý týraly tarıhı aıǵaqtar ushan-teńiz shyǵar jáne ol qujattardy Reseı, Túrkııa, О́zbekstan, Qytaı jáne Úndistannyń muraǵattarynan tabýǵa bolatyn shyǵar. Ekinshiden, Buqar jyraý túgeldeı qazaq halqy, tarıhymyz úshin aıryqsha tulǵa bolyp tabylady. Sondyqtan keleshekte Buqar jyraý ınstıtýty paıda bolýy múmkin dep oılaımyn. Ǵulama oıshyldyń murasyn zertteı kele jas urpaq óz halqynyń tarıhyn zertteı alatyn bolady. Sanany, tarıhty jáne rýhanııatty jańǵyrtý osydan bastalady. Senimdi bolashaqqa óz tarıhyn, uly qaıratkerlerin biletin jáne olardy jas urpaqqa úlgi etetin memleket qana qol jetkize alady, – dedi Erlan Qoshanov.
Qaırat ÁBILDA,
«Egemen Qazaqstan»
QARAǴANDY
