«Jahandyq álemdegi zamanaýı qazaqstandyq mádenıet» atty kitap serııasymen jaryq kórgen shyǵarmalarǵa aýdarma jasalmas buryn kitaphana basshylyǵy oqyrmandar tapsyrysy men talǵamyna bir jyl boıy júıeli túrde saraptama júrgizgen. Oqyrman suranysyna sáıkes Oljas Súleımenovtiń «Iаzyk pısma», Dýlat Isabekovtiń «Qarǵyn», Qoıshyǵara Salǵaranyń «Qazaqtar», Smaǵul Elýbaıdyń «Aq boz úı», Sherhan Murtazanyń «Boıtumar», Murat Áýezovtiń «Glavpochtamt», Beksultan Nurjekeulynyń «Áı, dúnıe-aı», Sháken Kúmisbaıulynyń «Balalyq shaq-baldáýren» atty shyǵarmalaryna kóbirek tapsyrys berilgen. Oqyrman ózi anyqtap, ózi suryptaǵan shyǵarmalar aǵylshyn, ıspan, fransýz, arab, qytaı tilderine tárjimalanyp, Almatydaǵy Ulttyq kitaphanada atalǵan kitaptardyń tusaýkeseri bolyp ótti.
Shyǵarmalary shet tilinde sóılegen qalamgerlerdiń bári de bul tusaýkeserdiń Prezıdent N.Nazarbaevtyń el tarıhy men halyqtyń jahandyq tarıhtaǵy ornyna tyń kózqaraspen qaraý múmkindigi nazarda bolatyn jańa «Uly dalanyń jeti qyry» atty maqalasymen úndestik taýyp otyrǵanyn bir aýyzdan atap ótti.
– «Uly dalanyń jeti qyry» atty Prezıdenttiń maqalasyn oqyp shyqtym. Eki jyl buryn «Rýhanı jańǵyrý» jobasyn bastadyq. Ol jobada da Elbasy tarıh týraly keńinen tolǵanyp aıtqan edi. Al biz áli kúnge «Aqtaban shubyryndydan» basqa eshqandaı tarıhty bilmeımiz. «Senderdiń naqty ispen aınalysatyn ýaqyttaryń boldy ǵoı» degendi meńzegen eken Prezıdent tarıhshylarymyzǵa. Ǵalymdardyń ǵylymmen aınalysýy úshin, bálkim Senat zań shyǵaryp, Prezıdent arnaıy Jarlyqpen bekitý kerek shyǵar? Ne sebepti halyqtardyń arasyna jik túsedi, memleketterdiń arazdasýyna ne sebep bolady, ǵasyrlar boıy sol halyqtar nege birin-biri keskilep, bir-birimen úzdiksiz jaýlasady? Munyń sebebin tek ǵalymdar ǵana aıta alady. Al bizdiń ǵalymdarymyzdyń muny anyqtaýǵa ýaqyty joq. О́ziniń týǵan tarıhyn, mádenıetin qorǵaýdyń ornyna, olar ǵylymmen emes, kandıdattyq, doktorlyq dıssertasııa qorǵaýmen aınalysady. Mine, Prezıdent maqalasynyń máni qaıda jatyr, – dedi Oljas Súleımenov.
Ulttyq kitaphana basshylyǵy bastamashy bolǵan jobany júzege asyrý tetigi retinde Qazaqstannyń Syrtqy ister mınıstrligimen ózara árekettestik pen yntymaqtastyq arqyly, sondaı-aq serııalyq basylymdy sheteldik kitaphanalarǵa, 24 memlekette ashylǵan qazaqstandyq ádebıet pen mádenıet ortalyqtaryna, saýda jelilerine syıǵa berý arqyly qazaqstandyq ádebıetti tanystyrýdy usynyp otyr.
Aıgúl AHANBAIQYZY,
«Egemen Qazaqstan»
ALMATY
