Mine, sondaı ıgilikti jobalardyń biri retinde Shymkent qalasynda muqtaj jandar úshin «IZGILIK» atalatyn tegin dúken ashyldy. Atalǵan dúken kúnkóris deńgeıi tómen otbasylar men jetim-jesirlerdi azyq-túlik, kıim-keshekpen qamtamasyz etýdi maqsat etken. Munda tek materıaldyq kómek kórsetilip qana qoımaı, jumyssyz azamattardy qabiletine qaraı jumysqa úıretedi. Osylaısha, olardyń qoǵamda óz ornyn tabýyna septigin tıgizedi.
«Izgilikte jarysaıyq» qaıyrymdylyq qoǵamdyq qorynyń uıymdastyrýymen jumys bastaǵan bul áleýmettik úıden muqtaj jandar aptanyń 6 kúninde qajetti zattaryn tegin alýyna múmkindik bar. Bul úshin ózimen birge jeke kýáligin, áleýmettik az qamtylatyn toptyń ókili ekendigin anyqtaıtyn qujatyn alyp kelse jetkilikti.
Dúkenniń ishki erejesi boıynsha muqtaj jan aıyna tek bir ǵana kıimge ıe bolmaq. Azyq-túlikti de otbasyndaǵy adam sanyna qaraı shamalap alyp kete alady. Al dúken sórelerindegi zattar qaıyrymdy qala turǵyndarynyń kúndelikti osy áleýmettik úıge alyp kelgen tartýlary. Aınalasyna qaraılasqandy azamattyq paryz sanaıtyn jandar Shymshahardaǵy Elshibek batyr kóshesinde ornalasqan №88 úıge atbasyn buryp, qajetti turmystyq zattardy ótkizýine bolady.
– Tek kıim-keshek taratyp qana qoımaı, qystyń kózi qyraýda jaýramas úshin otyny joq otbasylarǵa kómir túsirip berýdi josparlap otyrmyz. Árıne, bul ýaqytsha kómek. Degenmen, osyndaı saýapty isterdi kóptep uıymdastyrý arqyly qoǵam nazaryn áleýmettik jaǵdaıy tómen otbasylarǵa, múgedek jandarǵa aýdarmaqpyz. Tipti, eńbekke qabilettiligi joq aǵaıyndy qaıyrymdylyq qor arqyly baspanamen qamtamasyz etýdi qolǵa aldyq. Osy jyly kásipkerlerdiń qarjylaı qoldaýymen 2 úı satyp aldyq. Aldaǵy ýaqytta úısiz-kúısiz júrgen otbasylarǵa tabystaıtyn bolamyz», deıdi «Izgilikte jarysaıyq» qoǵamdyq qorynyń basshysy Asqar Máýlenov.
Dúken ashylǵan 10 kún ishinde 250 otbasyǵa kıim-keshek, 50-den astam otbasyǵa áleýmettik, turmystyq zattar úlestirilgen. Aldaǵy ýaqytta dúken jelilerin aýdandardan ashyp, aýyldaǵy áleýmettik jaǵdaıy tómen otbasylarǵa kómek qolyn sozýdy josparlap otyr eken.
Keıde kúndelikti qoqys jáshiginiń qasynda úıilip jatqan jamaý-jasqaýsyz kıim-keshek pen qalta toly aq nan qaldyqtaryn kórgende qaıyrymdylyqqa moıyny burylmaı júrgen adamdardyń qylyǵyna ishiń ashıdy. «О́zinen artylǵandy dalaǵa tastaǵansha nege muqtaj jandarǵa úlestirmedi eken?» degen suraq týady... Múmkin bul jandar «kereksiz» zattaryn kimge bererin bilmeı júrgen shyǵar. Endeshe, sondaı jandarǵa «IZGILIK» dúkeniniń meken-jaıyn kórsetip jiberseńiz, sol da qaıyrymdylyqqa barabar is bolmaq.
Nurshat TО́KEN,
«Egemen Qazaqstan»
ShYMKENT
