Oblys naryǵynda «Lavra» degen atpen belgili maı sapasynyń joǵarylyǵymen dúken sórelerinde kóp jatpaıdy. Endi «Prombaza–7» jaýapkershiligi shekteýli seriktestigi «Damý» baǵdarlamasy boıynsha 1 mıllıard 700 myń teńge ınvestısııa salyp, tazartylǵan maı shyǵarýdy qolǵa aldy. Bul oblystaǵy tazartylǵan ósimdik maıyn óndiretin alǵashqy qýatty maı zaýyty bolyp tabylady.
«Jańa maı zaýytynyń ınfraqurylysy oblys bıýdjeti esebinen múmkin boldy. Kelip turǵan gaz qubyryna jalǵanysymen zaýyt tolyq jumys isteı bastaıdy. Gazben qatar óndiriske sý da kerek, ol da oblys basshylyǵynyń kómegimen sheshimin tabatynyna senimdimiz» deıdi «Prombaza – 7» jaýapkershiligi shekteýli seriktestiginiń dırektory Muhamedjan Aqulov.
Zaýytta maı eki jeli arqyly óndiriledi. Burynnan jumys istep turǵan jelide ónim salqyn syǵylady, ıaǵnı tutynýshyǵa tanys «Lavra» maıy óndiriledi.Al ekinshi jańadan ornatylǵan jelide syǵylǵan maı odan ári tazartylady. Muhamedjan Aqulovtyń aıtýynsha, tazartylǵan maı tek eksportqa artýǵa baǵyttalǵan. Kásipker ónimdi ótkizýden eshqandaı qıyndyq bolmaıtynyn da aıtty. Tazartylǵan ósimdik maıyna Qytaıda da, Reseıde de, ózge elderde de suranys joǵary. Zaýyt shıkizatty oblys óńirindegi, kórshi Reseıdiń irgeles sharýashylyqtarynan satyp alady. Kúnbaǵys kúnjarasynan mal jemi daıyndalady.
Jańa maı zaýytyn oblys ákimi Arhımed Muhambetov aralap, ınvestısııalyq jobanyń iske qosylýǵa daıyn ekenin kórdi. Jańa zaýyt qýatynda jumys istegende, munda 30 jumysshy eńbek etetin bolady.
Názıra JÁRIMBET,
«Egemen Qazaqstan»
Qostanaı
