Myńǵa tarta adam bas qosqan saltanatty qabyldaý elimizdiń ánuranymen ashyldy. Túrkııa Prezıdentiniń bas keńesshisi Iаlchın Topchý bastaǵan saıasatkerler men ár salanyń kósh basynda júrgen zııaly qaýym ókilderi barsha otandastarymyzdy Táýelsizdik kúni merekesimen quttyqtap, Elbasy Nursultan Nazarbaevtyń syndarly saıasatynyń arqasynda tarıhy tamyrlas elderdiń dıplomatııalyq qarym-qatynasy jyl ótken saıyn óristep kele jatqanyn jetkizdi.
Elimizdiń táýelsizdigin alǵashqylardyń biri bolyp moıyndaǵan baýyrlas elde egemendik alǵan tustan bastap bes myńnan astam qazaqstandyq stýdent tegin bilim alǵan. Berik yntymaqtastyq qarym-qatynastardyń nátıjesinde 25 jyl ishinde Túrkııa elimizdiń tek qurylys salasyna 23 mıllıard dollar ınvestısııa quıypty. Odan bólek aýyl sharýashylyǵy, kólik-logıstıka, taý ken, formasevtıka syndy san saladaǵy birlesken jobalar eki memleket úshin de tıimdi nátıjesin bergen. Aldaǵy eki úsh jylda bul baǵyttaǵy seriktestik baılanystar odan ary qarqyn alady dep kózdelýde.
Iаlchın Topchýdyń sózinshe, qazir Qazaqstan men Túrkııa qarym-qatynasy eki kóshbasshynyń, qos Astananyń baılanysy qarqyndy damyp keledi. Sırııa máselesi boıynsha Astana prosesi qanshalyqty nátıjeli bolyp jatqanyna álem kýá. Bul Qazaqstannyń álemdik saıasattaǵy bıik bitimgerlik bedelin kórsetedi deıdi ol. Sondaı-aq túrik zııalylary Elbasynyń «Uly dalanyń jeti qyry» maqalasy Qazaqstan úshin ǵana emes, bútin túrki dúnıesi úshin tarıh tamyryna qan júgirtetin serpindi bastama dep esepteıdi.
– Eki memleket arasyndaǵy saıası baılanys óte joǵary deńgeıde dep aıta alamyz. Bul joǵary deńgeıdegi yntymaqtastyqtyń eń mańyzdy rólinde bizdiń Elbasymyz tur. Elbasymyzdyń túrki jurty ishindegi Túrkııanyń saıası-qoǵamdyq tobynyń arasyndaǵy bedeli asa joǵary. Muny tek qana Úkimet músheleri nemese joǵary laýazymdy tulǵalar ǵana emes qarapaıym halyqtan surasańyz da birinshi kezekte aıtatyny Elbasymyzdyń túrki álemindegi róli, onyń ishinde sońǵy jyldardaǵy tek qana Qazaqstan halqy úshin emes, túrki álemi úshin jasaǵan ıgi bastamalary tur. Bul rette Túrki tildes memleketterdiń yntymaqtastyq keńesin, Halyqaralyq Túrki akademııasyn aıryqsha ataı ketken jón. Túrkııanyń aldyńǵy qatarly tulǵalary Prezıdentimizdiń jýyrda ǵana jaryq kórgen «Uly dalanyń jeti qyry» maqalasyn túrki álemine shaqyrý retinde baǵalaıdy, tipti túrki álemine jasalǵan monıfest retinde qabyldaý qajettigin atap ótýde. Bul taraptan túrki mádenıetin, órkenıetin álemge tanytý barysynda eń aldymen óz aramyzda baǵdarlamalyq jobalardy júzege asyrsaq degen usynystar da joq emes, – deıdi Qazaqstannyń Túrkııa respýblıkasyndaǵy Tótenshe jáne О́kiletti Elshisi Abzal Saparbekuly.
Ústimizdegi jyldyń qyrkúıek aıynda ótken Elbasynyń túrik eline resmı sapary barysynda eki el arasyndaǵy birqatar aýqymdy jobalarǵa qol qoıylǵan bolatyn. Bul ınvestısııalyq-kommersııalyq jobalar el ekonomıkasyn damytýǵa sony serpin bermek.
Baýyrlas halyqtardyń rýhanı baılanysyn odan ári nyǵaıta túsken qabyldaý keshinde Súıinbaı atyndaǵy Almaty oblystyq Fılarmonııanyń quramyna kiretin «Adyrna» folklorlyq-etnografııalyq ansambli men «Altynaı» halyq bı ansambli qazaq ónerin joǵary deńgeıde kórsetip, kópshilikti tánti etti.
Arman OKTIаBR,
«Egemen Qazaqstan»
Ankaradan
